Det er sendt ut OBS-varsel for Agder, Telemark, Buskerud og Vestfold for regnvêret som kjem dei neste dagane.
No har meteorologane oppgradert varselet til fase A, og Østfold, Oslo og Akershus er også teke med i overvakinga.
Det vil seie at meteorologane set inn ekstra arbeidskrefter til å følge med på utviklinga, i tilfelle vêret utviklar seg til å bli ekstremvêr.
Allereie veldig vått
Meteorologane har allereie meldt at regnet skal hølje ned igjen. Årsaka til at dei no har auka overvåkninga, er at det kjem to lågtrykk etter kvarandre.
Eitt er allereie i gang med å pøse regn over Sør-Noreg, medan det andre kraftige lågtrykket kjem inn torsdag.
På meteorologisk institutt følger dei ekstra godt med på kvar nedbøren kjem til å treffe dei neste dagane.
Foto: Kamilla Pedersen / Met.no– Det har allereie regna ein del i Agder og Telemark. Ein varmfront har gitt det første regnet, medan ein kaldfront snart kjem inn over Vest-Agder, fortel vakthavande meteorolog Aurora Stenmark.
Senumstad i Aust-Agder har allereie fått ein god dose vatn. Der regna det 90,1 mm på eitt døgn, og det ser ikkje ut til å gi seg enda.
– Det kjem mykje regn i dag. Då blir bakken metta, og har ikkje like god kapasitet til å ta i mot det som kjem på torsdag, fortel meteorologen.
NVE har auka farenivået til oransje nivå for Agder og Telemark. Det er nest høgst på skalaen.
Torsdag kan det komme opp mot 50–100 mm nedbør kan komme på 24 timar ein del stader i Vest-Augder, Aust-Agder, Telemark, Vestfold og sørlege Buskerud, og det er ein av grunnane til at meteorologane er tidlig ute med å åtvare publikum.
Ikkje heilt likt førre uvêr
Stenmark fortel at dette regnvêret kan bli litt likt som førre vekes regnkaos, men det er framleis tidleg å seie.
– Det er ikkje sikkert alt regnet kjem på same plass. Det som også er annleis denne gongen er at nedbørsfeltet som kjem inn torsdag går raskare forbi. Det blir mykje regn, men det strekker seg ikkje like langt ut i tid, forklarer Stenmark.
Du der heime kan vere budd på vêret som kjem ved å å sjekke nyheitene for oppdateringar. Meteorologane på Twitter oppdaterer jamleg, og sjølvsagt kjem oppdateringar på Yr.no. På varsom.no kan du følge med på flaumvarselet.
