Her høljer det ned igjen

– Men det blir ikkje like ille som sist, seier meteorologen.

Nedbørsprognosar tysdag 15.september

I dei utsette områda kan det komme 50-80 mm nedbør i løpet av det neste døgnet.

Foto: Yr.no

Meteorologane åtvarar mot mykje nedbør og flaumfare dei neste dagane.

Agder-fylka, Telemark, Vestfold og Buskerud får igjen den verste støyten, men også resten av Austlandet har våte dagar i vente.

– Ikkje så ille som sist

Det er berre ei veke sidan førre kraftige regnvêr skapte kaos og gjorde skadar for fleirfaldige millionar kroner sør i landet.

OBS-varselet for det neste døgnet gjeld Agder-fylka, Telemark, Buskerud og Vestfold – omtrent dei som vart hardast råka i førre runde med regn.

Laster Twitter-innhold

Det har vore blautt allereie i morgontimane måndag, Senumstad i Aust-Agder har rekorden til no med 90,1 mm det siste døgnet.

Det er meir i vente, seier statsmeteorolog Per Egil Haga.

Flom på Rjukan i Telemark

På Rjukan vart menneske evakuert frå heimane sine på grunn av rasfare under flaumen i starten av september.

Foto: HANS-D.FLEGER / NRK

– Det blir størst nedbørsintensitet i kveld, i natt og første del av tysdag, fortel meteorologen.

Haga har nokre trøystande ord til dei som har førre vekes flaum i friskt i minnet.

– Det ser ut til at nedbørsaktiviteten er lågare denne gongen. Det ser ikkje så ille ut som førre kraftige nedbørsepisode.

– Rimeleg levelege forhold

Det seier statsmeteorolog Trond Thorsteinsson om vêret på Vestlandet og Trøndelag denne veka.

Austlandet tek nemleg den verste vêrstøyten, mens ein på vestsida av langfjella får nokre slengarar av regnbyene.

– Trøndelag får lite regn dei første dagane, medan Rogaland får mest. Men ikkje sinnssjukt mykje, melder Thorsteinsson.

Alt i alt blir det overskya, nokre regnbyer, temperaturar mellom 15–19 grader og som meteorologen sjølv seier: Heilt brukbart til å vere september.

Alnes

Skyene vil dominere vestlandshimmelen denne veka, men kanskje bryt dei opp og gir oss litt haustsol no og då.

Foto: @lykkelycke / Instagram

Torsdag kjem det regn frå Bermuda

Langtidsvakta John Smits fortel at torsdag er det i gang igjen. Då kjem eit kraftig nedbørsområde inn over oss, og det har reist langt.

– Lågtrykket har ein viss tropisk opphav. Det har i seg restane av den tropiske stormen «Henri», som oppstod som ein storm aust for Bermuda. Det vart fanga av vestavindsbeltet, og blir teke opp i lågtrykk utvikla i dette området, fortel Smits.

– Det blir våtast i same område som no. Vi er litt usikre på mengda, men det blir nok eit OBS-varsel igjen, fortel Smits.

Også Vestlandet og Trøndelag vil merke regnet.

I nord har dei nytt godt av eit stabilt høgtrykk som har gitt sol og fine haustdagar den siste veka. Dei kan halde fram å nyte nokre dagar til, men så er det over.

For lågtrykket som kjem inn torsdag, nøyer seg ikkje med å berre dusje Sør-Noreg.

– Regnet jobbar seg radig nordover i landet. Allereie torsdag kveld er det komme sør i Nordland, og fredag kjem det med regn til Troms og Finnmark.

Også helga vil bli prega av regnbyer, men då kjem vêret frå nord. Det vil seie at områda Austafjells slepp lettast unna.

Senja i sol

Nyt sola på Senja nokre dagar til! Fredag kjem haustvêret igjen.

Foto: @trollywoodronny / Instagram