El Niño (gutebarnet) fekk namnet sitt av fiskarar i Peru som merka at det stundom kom ein varmeperiode rundt juletider, og dei kalla det opp etter Jesusbarnet. Fenomenet fører med seg mye nedbør og elendig fiske, så namnet er ikkje særlig flatterande.
Det dårlige veret har eg sjølv vore vitne til: som ung ryggsekkraddis drog eg hausten 1998 til Sør-Amerika like etter den verste El Niño-episoden på mange tiår.
På veg frå Ecuador til Peru leigde vi drosje frå grensa. Etter nokre mil var det brått stopp---100 meter landeveg var vaska til havs. Men drosjesjåføren lot seg ikkje affisere---han tok ein tur i ørkensanden med sin gamle amerikaner og vi rakk flyet.
Slik er normale år
I eit normalår bles passatvinden mot vest i Stillehavet og stuvar vatn opp langs kysten av Indonesia og Australia. Alt dette varmet vatnet blir lagra i djupet. Samstundes vellar det opp kaldt og næringsrikt vatn langs kysten av Peru for å erstatte alt vatnet som blir blåst vestover. Dette gir rikt fiskeliv og eitt av dei største fiskeria i verda.
Og slik er eit El Niño-år
I eit El Niño-år slakkar passatvinden av (sjå faktaboks og fig 1 og 2). Dermed kan vatnet som er stuva opp langs kysten av Indonesia renne tilbake langs ekvator mot Sør-Amerika (sjå fig 3). Dette gir svært varmt overflatevatn og store mengder nedbør. Det skrur også av oppvellinga langs kysten av Peru, og dermed sviktar det viktige fiskeriet.
Stillhavet har lagra varmt vatn
Så til klimaet. Vi har lenge høyrt at kloden ikkje blir varma opp så raskt som klimaforskarane spådde. Det viser seg at dette og heng saman med El Niño. Hugs at det varme vatnet som blir frakta med passaten blir "gøymt" i djupet. Sidan det no er lenge sidan vi har hatt ein stor El Niño-episode (1997-98) betyr det at store mengder varmt vatn er blitt lagra i den vestre delen av Stillehavet. Dermed har og den globale temperaturen stege mindre enn forskarane spådde.
No er El Niño tilbake med full kraft og alt det varme vatnet kan ikkje lenger gøymast i djupet. Februar 2016 var den varmaste februarmånaden som nokonsinne er målt, og det stoppar neppe der. På tide å finne fram høgvannsbuksene.
Les mer: