Du høyrer ofte oss meteorologar seie at det har vore kaldare enn normalt denne månaden, eller at det har vore meir nedbør enn normalt i sumar. Då refererer vi til gjennomsnittsverdiar for ein fast 30-års periode, ein standard normalperiode. Det er perioden 1961–1990 som gjeld no og fram til og med 2020. Frå 2021 er det perioden 1991–2020 som blir ny standard.
Det er Verdas meteorologiorganisasjon, WMO, som har sett desse internasjonale retningslinjene. Etter nylege diskusjonar er det no bestemt at ein skal oppdatere normalane kvart tiande år, slik at dei gjeld for dei siste 30 åra. Dette er betre i samråd med eit klima i stadig endring.
Her på Meteorologisk institutt bruker vi normalane kvar dag for å samanlikne dagens vêr med korleis det har vore tidlegare. Du bruker kanskje normalar sjølv av og til? Til dømes om du vurderer å hoppe på ein tur til Spania neste månad. Før du bestemmer deg vil du gjerne vite korleis temperaturen normalt sett er der den månaden. Eit raskt søk på yr.no gir deg svaret. I Benidorm til dømes, er normaltemperaturen 15,2 gradar i november. Dette svarar faktisk til normaltemperaturen for Oslo i august, så du kan sjå fram til ein god norsk seinsumar om du vel å reise.
Som Reidar er inne på, er det litt rart å bruke ein så gamal periode i dag. Fram til vi får ein ny internasjonal standard i 2021 er det mange som har laga sine eigne normalar. NVE bruker til dømes 1971–2000 som normalperiode på senorge.no. På Meteorologisk institutt har vi laga eigne uoffisielle normalar for perioden 1981–2010.
