Vêret held fram i samme stil

– Grip dei fine dagane som er! Det er meteorologen sitt beste råd for denne sommaren.

Kan bli fine periodar i nord

Også denne veka er «ustabilt» stikkordet for ferievêret. Meteorologane har framleis ingen kraftige høgtrykk i sikte, og det er dei vi ventar på for å få ei varig betring for sommarvêret.

I nord kan ein trøyste seg med at det berre blir litt vått denne veka. Ein varmfront kjem

med regnbyer, men har også med seg gode temperaturar.

– Tysdag og onsdag kan det vere periodar med regn, men det går fort forbi, fortel Rafael Escobar Løvldahl ved vêrvarslinga i Tromsø.

– Utanom det kan det bli periodar med sol, spesielt vest i Finnmark og Troms, fortel meteorologen.

Medan Troms og Finnmark kan få periodar med sol, er det meir usikkert i Nordland. Der vil vêret veksle mykje.

– Det er framleis fuktig, men meir på grunn av kortare regnbyer enn vedvarande regn, fortel Rafael Escobar Løvdahl.

Nordavind i sør

– Måndag er utan tvil den beste dagen denne veka, slår meteorolog Vibeke Thyness fast om vêret Austafjells.

Det er på grunn av nokre kraftige lågtrykk som kjem med mykje regn tysdag kveld og onsdag. Også lyn og torevêr kan treffe der byene blir som verst.

– Aller mest blir det langs kysten, i Telemark og Vestfold og Oslofjorden. kanskje slepp Hedmark og Oppland litt unna, fortel meteorologen.

Kanskje blir det litt betring mot slutten av veka, med lettare skydekke og mindre regn. Men den heilt store sommarvarmen let vente på seg.

– Nordavinden gjer at det blir litt ekstra kaldt. Når sola bryt igjennom er vi kanskje oppe å snusar på 20-talet, men elles kan vi vente oss rundt 16–17 grader, avsluttar Thyness.

Vêret gjer meteorologen i Bergen oppgitt

Den varierande sommaren er heller ikkje stas for dei som jobbar med å melde vêret.

– Veit ikkje heilt kva eg skal sei eg, sukkar meteorolog Trond Throsteinson ved vêrvarslinga i Bergen.

– Det blir litt skiftande og halvgreitt vêr, slik dei siste dagane har vore.

Thorsteinson konkluderer med at det er regnbyene som til sjuande og sist pregar veka på Vestlandet og i Trøndelag.

Medan Trøndelag og Møre og Romsdal får først regn i byrjinga av veka, vil Rogaland og resten av Vestlandet få meir av det våte når veka går mot slutten.

Og temperaturane kan imponere med å snike seg opp mot 20 grader i byrjinga av veka i vest, før nordavinden kjem med kaldluft mot slutten.

Sidan regnbyene dei aller fleste får ein smak av denne veka er vanskelege å varsle, er det lurt å følge med på regnbyene på nedbørsradaren.