Siste, våte rest av sommaren

Himmelen har opna slusene på Sør-Noreg dei siste dagane. No kjem det nordover.

Det viktige, men litt kjipe vêret

Det er regnet du må få vêre obs på i starten av denne helga. Eit skikkeleg uforutseieleg og skiftande lågtrykk har gitt nokre våte dagar i sør. Natt til fredag og utover morgonen er det Møre og Romsdal, Trøndelag og Nordland som blir dusja.

– Det er vanskeleg vêr for tida! Det konstaterer Anne Solveig Andersen ved vêrvarslinga på Vestlandet.

Årsaka til frustrasjonen er eit lågtrykk som ligg mellom Island og Skottland. Det kjem med både vind og mykje av det våte innover kysten, men det er ikkje lett å seie akkurat kvar det kjem til å dumpe ned.

– Det kjem til å bli store lokale variasjonar, fortel meteorologen.

Lågtrykket held seg i same trakter gjennom helga. Det vil gi skiftande vêr til heile Sør-Noreg, altså både periodar med sol og spreidde regnbyer.

Oppsymmert blir det meir regn og skyer på kysten i vest, og jo lenger aust du kjem blir solperiodane lengre og regnbyene færre. Det kan faktisk bli opp mot 20 grader og badevêr Austafjells!

Men hugs: vêret er ustabilt, og alle regnbyene vil ikkje vise på timesvarselet på Yr. Vi har nokre gode tips til korleis du unngår å bli tatt av vêret og sjølv brukar varsla på Yr til å sjå når regnbyene kjem.

Slutt på sommaridyllen i nord

– Blir det varmar nu så flytte æ sørover!

Det skreiv ein yr-brukar frå Nord-Noreg til oss tidlegare i sommar. Og det er vel litt same stil som forholda har vore denne veka.

Sommaren har verkeleg gjort ein innspurt nord i landet denne veka. Men no må meteorolog Trond Lien ved vêrvarslinga i Tromsø også pakke bort shortsen, for i helga ser sommaridyllen ut til å ta slutt.

– Fredag blir det vêromslag i Nordland. Det startar først på Helgeland, og breier seg etter kvart nordover med vinden, fortel meteorologen.

Troms og Finnmark kan nyte ein fin fredag men til slutt kjem regnet også dit. Det blir relativt grått og vått i Nordland, ganske mykje sol i Finnmark, og Troms havnar midt i mellom på skalaen.

Nyt no!

Vêrgudane har fått med seg at den første haustmånaden snart står på kalenderen neste veke.

– Med unntak av Spitsbergen blir det ein våt start på september for alle, konstaterer langtidsvakt på Meteorologisk institutt, Marit Helene Jensen.