Meteorologen: – Regn opp til 1500 meter over havet

I store delar av landet er det grunn til å sjekke vêrmeldinga eit par gonger ekstra før du legg ut av døra i starten denne helga.

• På Yr.no/obsvarsel finn du det viktigaste.

Varm luft lagar vêrkaos

Vêrkalaset startar torsdag ettermiddag, og held fram inn i fredagen. Fleire lågtrykk har slått seg saman og laga eit kraftig vêrsystem. Dette opplegget treff kysten torsdag ettermiddag, fortel Ida Marie Solbrekke ved vêrvarslinga på Vestlandet.

Det har med veldig mykje varm og fuktig luft, og kvikksølvet vil gjere eit kjempehopp på termometeret natt til fredag.

Her er nokre av utfordringane vi har i vente:

Torsdag ettermiddag er det venta sterk vind i Møre og Romsdal, Trøndelag og Nordland. Det blir liten storm utsette stader på kysten, og periodevis opp i full storm. I Troms og Finnmark det opp i sterk kuling.

Saman med vinden kan Møre og Romsdal vente seg kraftig nedbør. Det same gjeld for Sogn og Fjordane og Hordaland. I Sogn og Fjordane kan det komme 140–170 mm i løpet av 36 timar.

• Sjekk flaumvarselet på Varsom.no

Kombinasjonen av mykje vind og nedbør lagar trøbbel i fjellet.

Over fjellovergangane i Sogn og Fjordane, Hordaland, Møre og Romsdal, Sør-Trøndelag, Oppland, Hedmark og Buskerud er det venta svært vanskelege køyretilhøve.

Som sagt blir det veldig mildt i løpet av natt til fredag, og nedbøren går frå snø til regn. Utover fredag held dette blaffet av varme seg.

– Snøgrensa vil skyte i vêret. Faktisk blir det ingen snøgrense omtrent, er meteorologen si brutale melding.

Opprettheld fase A-varsel i nord

Når vi legg saman lågt trykk, sterk vind inn mot kysten og astronomisk høgt tidvatn på grunn av fullmåne, blir det skikkeleg høg vasstand langs kysten.

• Meteorologane åtvarar: – Kan bli vasstand på ekstremvêrnivå

Frå Harstad i Troms til Grense Jakobselv i Finnmark kan vasstanden gå 50–60 centimeter over det som er meldt i tidvasstabellen fredag ettermiddag, og meteorologane held oppe auka overvaking fram mot fredag.

Meteorologen påpeiker at mykje sjø og høge bølger kan gi eit ekstra pådrag på det heile. dette er ikkje dagen ein går på tur på moloen, altså.

Rolegare helg

Vêrsystemet rasar frå seg fredag, og roar seg til regnbyer i løpet av laurdagen.

– Når framfronten går forbi så droppar temperaturen ganske mykje. Det kan bli snø langt ned igjen, melder meteorologen i Bergen.

Men ho vil ikkje love noko sol på denne kanten, då ser det betre ut Austafjells.

Der blir det også litt ustabilt. Vestavêret dreg seg over fjella natt til laurdag med nedbør og varmluft, og laurdag ettermiddag er det ny runde.

Men: Midt på dagen laurdag kan det bli sol Austafjells, er gladnyheita frå Blindern!