Nord-Noreg er vekas solvinnar

... Dersom havtåka ikkje øydelegg moroa. I Sør-Noreg vert det typisk sommarvêr med ettermiddagsbyer og milde temperaturar denne veka. Det er også fare for torevêr fleire stadar i sør.

Sommer i Lofoten

SOL I NORD: Men vil havtåka ved kysten i nord skugge for sola? Bildet er frå Skagen strand i Lofoten.

Foto: Karen Bakke @karen_mb_ / Instagram

Starten på veka vart for fleire på Vestlandet og Austlandet ei våt og dramatisk oppleving. Dei intense regnbyene roa seg i løpet av måndagen, og vêrsituasjonen for resten av veka vert ein litt annan i Sør-Noreg.

– Tysdag og onsdag er det varsla ettermiddagsbyer som kan treffe områda frå Sør-Trøndelag og sørover, men ikkje så gale som på søndag og måndag. Område i Sør-Noreg kan få ein god del fint vêr innimellom regnbyene desse to dagane, fortel vakthavande statsmeteorolog Aslaug Skålevik Valved.

Laster Twitter-innhold

Finast vêr vert det i Nord-Noreg denne veka. Om dei problematiske tåkeskyene held seg vekke.

Trøbbel med tåkeskyer

– Nord-Noreg er prega av eit høgtrykk som gir opphaldsvêr og sol til nordlendingane. Men samstundes er det risiko for låge tåkeskyer i område ved kysten av Troms og Finnmark som kan gje grått og kjølig vêr, opplyser statsmeteorolog Matilda Hallerstig.

– Ved kysten stangar to luftmassar mot kvarandre og det skal lite bevegelse til før vêret endrar seg frå sol til tåke, forklarar meteorologen.

Kaldluft frå havet og varmluft frå innlandet kjempar mot kvarandre, og om tåka eller sola sigrar står att å sjå. Også område i Lofoten og Vesterålen er utsett for tåke som kan øydelegge for sommarsola. Innersida av Lofoten er sikrare.

Laster Twitter-innhold

– Utanom tåka ved kysten er det sjanse for bra vêr i Nordland. Bodø kan eksempelvis nyte rundt 20 grader, seier Hallerstig.

Trøndelag kan også få greitt sommarvêr denne veka. Tysdag vert beste dagen, og etter tysdag vert det litt meir blanda vêr med periodar med sol og regn, som resten av Sør-Noreg, ifølgje Hallerstig.

Regnbyer i Sør-Noreg

Ser vi på heile veka under eitt ser tysdag og onsdag ut til å vere dei sikraste finvêrsdagane i Sør-Noreg. Temperaturane vil ligge rundt 20–25 grader mange stadar.

– Men vekevêret i heile Sør-Noreg er prega av typisk norsk sommarvêr. Det er mykje fint vêr i Sør-Noreg tysdag og onsdag, men på grunn av varmen kan det også danne seg ettermiddagsbyer fleire stadar, seier Aslaug Skålevik Valved.

Tysdag og onsdag er det også fare for at ettermiddagsbyene har tore i seg. Torevêret kan kome til Trøndelag, Møre og Romsdal, Oppland, Hedmark og Buskerud.

– Det er vanskeleg for vêrmodellane å plukke opp akkurat kvar regnbyene treff. Har du planar utandørs vil eg anbefale folk å lese tekstvarselet og sjekke radarbildet eller nåvarselet for regn, oppmoda meteorologen.

Torsdag kan fleire lågtrykk truge med meir regn både på Vestlandet og Østafjells. Temperaturane vil falle litt, men vil framleis vere nokså milde, fortel statsmeteorolog Skålevik Valved.