Meteorologen: – Stormflo frå Trøndelag til svenskegrensa

Fredag kjem ein ny hauststorm inn over landet. Det blir vått og vindfullt, og store delar av den lange kysten vår vil merke flo som går langt over det vi er vant til.

Meteorologane har sendt ut OBS-varsel om storm og vasstand over ein halv meter høgare enn det står i tabellen over tidvatn langs kysten frå Egersund i sør til Rørvik i Trøndelag:

• Fredag er det venta vasstand 50–75 cm over det som er meldt i tabellen.
• Laurdag er det venta vasstand 60–85 cm over det som er meldt i tabellen.

Prognosane for natt til laurdag viser enda høgre vasstand for områda lenger sør. Det er enda tidleg å gå ut med varsel, men meteorologane åtvarar om at høg flo og store bølger kan skape problem også der:

• Natt til laurdag kan vasstanden bli 80–110 cm over det som står i tabellen frå Egersund til Arendal.

  

Månen og vind gir stormflo

Det er fleire grunnar til at vatnet blir så høgt, fortel statsmeteorolog Gunnar Livik.

Fredag er to dagar etter nymåne, og då er maksimalt tidvatn høgst.
Når vinden kjem frå sør-sørvest tek den med seg meir vatn inn mot kysten, og det blir det stor oppstuing av vatn.

I tillegg til høg vasstand kan det bli mykje bølger. Pass på å rydde inn ting som kan flyte av garde når vatnet står høgt, og sørg for at båtar og flytebrygger er godt sikra.

Verst i vest

Sjølve stormen blir sterkast i Sogn og Fjordane, seier statsmeteorolog Gunnar Livik. Den første fronten med nedbør kjem inn natt til fredag.

Langs kysten nord for Florø og rundt Stadt blir det full storm fredag føremiddag. Utover ettermiddagen vil lågtrykkssenteret bevege seg austover, og vinden minkar til liten storm sør for Stad.

– Når senteret går austover vil det bli liten storm i Møre og Romsdal, melder Livik.

I samband med stormen er det også venta kraftige regnbyer med mykje nedbør i Rogaland, Hordaland, Sogn og Fjordane og Møre og Romsdal.

• Følg med på regnet på vêrradaren

Også sør for frontane, i Hordaland og Rogaland, vil det bli sterk vind og byevêr. I Trøndelag vil vinden auke til sterk kuling mot fredag kveld når fronten kjem i deira retning.

Skal du over fjellovergangane i Sør-Noreg fredag, må du vere budd på heftig vêr. For Sogn og Fjordane, Telemark, Buskerud, Oppland og Hedmark er det sendt ut OBS-varsel om vanskelege køyretilhøve i fjellet grunna snøfokk.

– I fjellet kan det blir sterk kuling og kanskje liten storm utsette stader over 1000 meter, åtvarar meteorologen.

Over 1000 meter kan nedbøren komme som snø, så her kan det fort bli glatt og dårleg sikt.

Følg med på Yr.no for oppdaterte varsel. Det kan også vere lurt å følge med på Meteorologane på Twitter for oppdatert informasjon.