Hugs å trekk ut støpselet på fredag. Eit lågtrykk sveipar over heile landet, og gjer det utrygt for torevêr frå sør til nord.
- Les også: Derfor lyner og tordner det
Sjå kvar nedbøren er på vêrradaren, og på vêrkartet kan du sjå når regnet truleg treff deg.
Lågtrykket kjem først sør for Stad
Der blir det regn og fare for torebyer allereie natt til fredag.
Fredag ettermiddag flyttar regnbyene seg opp til Møre og Romsdal og Trøndelag, og gir Vestlandet sjansen til å få ein fin fredag ettermiddag og laurdag.
Og hold på hatten - her kan også sola kika fram!
– Det blir finare jo lenger sør du kjem, fortel statsmeteorolog Frode Hassel.
Den vesle høgtrykksryggen som gir fint vêr i vest, held stand til søndag. Då kjem eit nytt lågtrykk inn over kysten.
Kort sagt: laurdag blir best sør for Stad, medan fredag føremiddag og søndag blir best nord for Stad.
Meir regn til Aust-og Sørlandet
Etter ei våt veke med OBS-varsel på Sør- og Austlandet, tek vêrgudane framleis ikkje pause.
- Les også: 55 millimeter nedbør på 12 timer
For vêrsystemet som gjer fredagen grå i vest, oppfører seg på same vis Austafjells.
– Helga blir like vekslande som før i desse omskiftelege tider, fortel meteorolog Per Egil Haga.
Det vil seie at fredag innleier helga med regnbyer og fare for torevêr. Men slik som vestanfor, flyttar regnbyene seg nordover etterkvart.
– Laurdagen ser ut til å bli riktig fin sør om Oslo, fortel meteorologen.
Nord for Oslo heng gråvêret litt igjen, men også her kan det lette opp innimellom.
Til sist, men like vått, i nord
Det har vore fine dagar i nord i det siste. Troms var varmast i landet onsdag, og Bodø kunne notere sin første dag med over 20 grader.
Men fredag set vêrsystemet som sveipar over landet til Nordland ein stoppar for varmen. Gjennom helga held det fram på si ferd gjennom Troms og Finnmark.
– Fredag ettermiddag dundrar lågtrykket nordover med kraftig nedbør, fortel meteorolog Ine-Therese Pedersen i Tromsø.
Fredag ettermiddag eller kveld blir det vått i Nordland, og gjennom laurdag og søndag helde det fram gjennom Troms og Finnmark.
– Fredagen kan bli fin i Troms og Finnmark, seier Pedersen.
– Laurdagen blir grå i heile området. Men søndag kan bli litt hyggeligare med glimt av sol, oppsummerer meteorologen.