Er det vår i sikte?

På seinvinteren er det mange Yr-lesarar som lengtar etter våren, men når kjem våren eigentleg? Er våren rett rundt hjørnet?

Snøsmelting i Seimsdalen i Årdal

Sola varma godt i Seimsdalen i Årdal den 19. februar 2013. Per definisjon startar våren den 6. mars i Sogn og Fjordane.

Foto: Gro Fretland

Når våren kjem til din stad er sjølvsagt avhengig av kvar du er i landet. Våren er definert som perioden av året der døgnmiddeltemperaturen ligg mellom 0 og 10º C.Tendensen i temperaturen må også vere stigande gjennom perioden.

Nokre stader får ikkje vinter

I kyststroka mellom Agder og Trøndelag er det aldri vinter. Her fungerer havet som ein varmeovn. Døgnmiddeltemperaturen gjennom vinteren ligg over 0º C. I løpet av vinteren kan det sjølvsagt vere snø og minusgrader også her, nokre år meir enn andre. Men så er det viktig å hugse at klima er gjennomsnittsvêret gjennom 30 år!

Våren startar ved kysten

I lista under finn du ut når temperaturen byrjar å stige igjen, og dermed når ein reknar at våren så smått startar. Denne lista er basert på 1961-1990-normalen. Denne normalen er relativt kald i høve dei siste 30 åra, så fleire stader på kysten kan uoffisielt ha "mista" vinteren per definisjon. Under finn du eksempel på målestasjonar som ikkje har vinter i høve normalen:

  • Bergen (Hordaland): 06. februar. Temperaturen stig frå 1,1 til 1,2º C.
  • Tafjord (Møre og Romsdal): 08. februar. Temperaturen stig frå 0,3 til 0,4º C.
  • Sola (Rogaland): 11. februar. Temperaturen stig frå 0,3 til 0,4º C.
  • Lista fyr (Vest-Agder): 14. februar. Temperaturen stig frå 0,3 til 0,4º C.
  • Svinøy fyr (Møre og Romsdal): 14. februar. Temperaturen stig frå 2,6 til 2,7º C.
  • Myken (Nordland): 15. februar. Temperaturen stig frå 0,3 til 0,4º C.
  • Utsira fyr (Rogaland): 17. februar. Temperaturen stig frå 1,6 til 1,7º C.
  • Sklinna fyr (Nord-Trøndelag): 17. februar. Temperaturen stig frå 0,6 til 0,7º C
Hestehov titter frem gjennom snøen

Hestehov tittar fram gjennom snøen

Foto: Knut Dreiås

Våren rundt om i landet

I lista under finn du når våren startar per definisjon rundt om i landet, basert på gjeldande temperaturnormal:.

  • Ørland (Sør-Trøndelag): 20. februar
  • Oksøy fyr (Vest-Agder): 23. februar
  • Torungen fyr (Aust-Agder): 01. mars
  • Lærdal (Sogn og Fjordane): 06. mars
  • Færder fyr (Vestfold): 08. mars
  • Værnes (Nord-Trøndelag): 15. mars
  • Oslo: 17. mars
  • Rygge (Østfold): 18. mars
  • Skrova fyr (Nordland): 19. mars
  • Bodø (Nordland): 25. mars
  • Gardermoen (Akershus): 30. mars
  • Rena (Hedmark): 06. april
  • Andøya (Nordland): 06. april
  • Fagernes (Oppland): 08. april
  • Tromsø (Troms): 11. april
  • Fruholmen fyr (Finnmark): 12. april
  • Bardufoss (Troms): 17. april
  • Alta (Finnmark): 19. april
  • Røros (Sør-Trøndelag): 20. april
  • Geilo (Buskerud): 22. april
  • Vardø (Finnmark): 26. april
  • Fokstugu (Oppland): 28. april
  • Møsstrand (Telemark): 28. april
  • Kautokeino (Finnmark): 04. mai
  • Jan Mayen: 23. mai
  • Bjørnøya: 28. mai
  • Svalbard lufthavn: 04. juni