Veka startar vått i sør og fint i nord

Lågtrykka held fram med å pøse regn over landet i tide og utide. Veka har starta fint i nord, medan det i sør er sendt ut OBS-varsel både for Austlandet og Rogaland.

Plaskevêr i sør

Eit kraftig lågtrykk kjem med mykje regn til Austlandsfylka, Sørlandet og Rogaland. Det blir mest nedbør tysdag ettermiddag og kveld.

– Det er nok nedbør til at det kan by på små problem, spesielt i byane der det er mykje asfalt og betong og vatnet ikkje har plass til å renne unna, seier meteorolog Øyvind Johnsen.

Med lågtrykket kan det også kome tore og lyn, og brannvesenet i Vestfold minner folk på å trekke ut støpselet i kveld.

Allereie onsdag vil det klårne opp i sør, og nedbøren begir seg vidare mot Hedmark og Trøndelag.

Austafjells blir vêret lettare ut veka, med klassisk byevêr og sol imellom slaga.

Også Vestlandet får sin dose

Rogaland får det også vått tysdag, medan Trøndelag og delar av Møre og Romsdal har fått ein fin og varm start på veka.

Onsdag går vêret tilbake til sommarens signatur; regnbyer med solgløtt innimellom, både nord og sør for Stad.

– Torsdag kan det bli fint og rundt 20 grader nord for Stad, og litt meir nedbør søranfor, fortel meteorolog Martin Granerød.

Fredag ligg det igjen frontar over heile Vestlandet og Trøndelag, og gir meteorologane og yr.no noko å bryne seg på.

– Med vêret som er no er det vanskeleg å melde 5–6 timar fram i tid, avsluttar Granerød.

Fin start i nord

– Onsdag blir den store dagen i Troms, fortel Gunnar Noer ved vêrvarslinga i Tromsø.

• Les også: Nå kjem varmen til Nord-Noreg

I alle fall starten på dagen. Etter kvart kan restane av nedbøren som har herja Sør-Noreg også treffe nordland, og kanskje trekk den seg også nordover etter kvart.

Torsdagen blir litt grå og kanskje litt våt innimellom, men så ser det kanskje lysare ut etter kvart.

– Fredagen kan også bli fin, med opphaldsvêr og temperaturar rundt 15–16 grader fortel meteorologen.

Helga ser usikker ut, er meteorologane einige i. Det ustabile vêret gjer prognosane usikre, og det beste du kan gjere som yr-brukar er å halde eit auge med meteorologens tekstvarsel, vêrkartet og nedbørsradaren for ditt område.

Og sjølvsagt nyte sola når ho kjem fram, og ha regnjakka tilgjengeleg for regnbyene som vil treffe dei fleste i løpet av veka.

• Les også: Slik blir du en betre yr-bruker
• Les også: Derfor bommar yr på varslene