Tropenatta snubla på oppløpet

No må vi kanskje vente til august for neste sjanse.

Solnedgang, Solastranden

Sola i Rogaland var 0,1 grad under grensa for tropenatt, natt til 3. juli.

Foto: Frode Lyse

Det låg lenge an til at sommarens første tropenatt skulle kome natt til fredag. Men det sette regnet ein stoppar for, i aller siste liten.

Vestlandet og Trøndelag hadde alle topp 20-temperaturmålingane torsdag, takka vere føneffekten som kom med varme vindar frå Europa. Varmen heldt stand gjennom natta.

Sommardag-varme midt på natta

– Det var heilt utruleg varmt, nokre stader var det 25 grader rundt midnatt i går, fortel meteorolog Vibeke Wauters Thyness.

For at det skal kvalifisere til tropenatt, må det vere over 20 grader heilt fram til klokka 08.00 dagen etter. Og det var vanvittig nære på.

– I Tafjord låg temperaturen over 20 heilt fram til klokka 7 i dag tidleg. Då kom det inn regn. Temperaturen sank med nesten fem grader, så dessverre rauk det, seier meteorologen.

I Rogaland sank ikkje temperaturen like drastisk. Der ligg dei fire stasjonane som målte høgast minimumstemperatur i natta som var.

Minimumstemperaturar natt til 3.juli

Stad

Minimumstemperatur

Sola

19,9

Fister - Sigmundstad

19,3

Stavanger - Våland

19,2

Vats i Vindafjord

19,1

Også i Rogaland var det minimale marginar som skilte den fine sommarnatta frå å bli tropenatt. I Sola duppa kvikksølvet så vidt ned i 19,9 grader på morgonkvisten, stakkarslege 0,1 grad for kaldt til å kvalifisere til tropenatt-tittelen.

Atlanterhavsvegen

Klokka 22.00 var det 22 grader ved Atlanterhavsvegen på Nord-Møre, skriv ein lesar på biletet merka #yrno på Instagram.

Foto: @john_karstein / Instagram

Lenge til neste moglegheit

Resten av juli har ikkje oddsa på si side for å få ei tropenatt, meiner meteorologen. dette kan ha vore sommarens varme veke, for trenden ser kaldare ut dei neste tre vekene.

– På Austlandet er det ikkje sjanse i havet, bokstavleg talt, slår meteorologen fast.

– Rett og slett fordi det er for kaldt i vatnet, så temperaturen vil søkke om natta.

Vestlandet og Trøndelag er avhengige av varm vind frå sør for å få varme netter. Høgtrykket som har lege gunstig til og blokka for ustabilt vêr den siste veka er på veg til å bli svekka, og mykje tyder på at vinden vil snu.

Laster Twitter-innhold

Vêret er lunefullt, og langtidsvarselet er ikkje skrive i stein. Kanskje kjem august med nye, varme sommarnetter.