Her kan det bli tropenatt

Første dag i juli vart også første tropedag, og knalltemperaturane held seg til fredag.

Varmt ved Krøderfjorden.

TROPEVARMT: Sprederen måtte fram i denne hagen ved Krøderen i Buskerud.

Foto: Kristin Rove Bentsen

Nedre Eggedal og Gulsvik i Hallingdal har klatra over den magiske 30-gradersgrensa, og kan notere seg sommarens første tropedag,

Over 30 grader

– Indre Trøndelag og Nord-Møre ligg an til å få det varmast torsdag, om eg skal plukke ut ein vinnar, fortel meteorolog Geir Ottar Fagerlid ved værvarslinga i Bergen.

Også her kan det bli over 30 grader. I resten av Sør-Noreg ligg tilhøva til rette for temperaturar godt over 20 grader. Er det tropedag i vente for fleire?

Vi kan takke hetebølga i Nord-Europa for dei varme dagane no i starten av juli. I Paris var det over 40 grader onsdag, og litt av denne varmen får også vi smake på i Norge.

Geir Ottar Fagerlid

natt til fredag kan Geir Ottar Fagerlid og dei andre meteorologane kanskje melde første tropenatt denne sommaren.

Foto: Meteorologisk Institutt

– Kraftige vindar i dei øvre luftlaga fraktar med seg den varme lufta frå sør, og skapar ein føneffekt, seier meteorologen om den plutselege varmen.

Det spesielle med denne vesle perioden, er at det blir mykje vind, og ikkje nødvendigvis sol. Fjella gjer at den varme vinden slår ned i dalane, og det blir stor lokal effekt av dei varme vindane frå sør.

– Supert klestørkevær, men bruk mange klesklyper, anbefaler Fagerlid.

Der sola faktisk kikar fram, kan kvikksølvet få eit ekstra lite puff oppover gradestokken.

Maxtemperatur 2.juli

Eit etterlengta syn etter ein kjølig start på sommaren.

Foto: MET

Får vi årets første tropenatt?

Dei varme dagtemperaturane kan også halde seg utover natta i Trøndelag og nord i Møre og Romsdal.

Men fredag er ein kaldfront venta å passere store deler av Sør-Noreg. Når denne treffer og kor mykje nedbør den har med, avgjer om natt til fredag blir årets første tropenatt. Det vil seie at temperaturen ikkje går under 20 grader.

– Det er venta litt nedbør og kanskje torevêr vest for Langfjella. Den kan avgjere kor høg temperaturen blir om natta, fortel Fagerlid.

Laster Twitter-innhold

Varm luft heilt til Helgelangskysten

Varmen strekk seg opp mot polarsirkelen desse første julidagane.

– Helgelandskysten kan få opp mot 20 grader torsdag, fortel Trond Lien frå vêrvarslinga i Tromsø.

Øvst i Nordland og sør i Troms ligg ein varmfront og skil mellom varmt vêr i sør og kaldare i nord. I dette skiljet vil det bli mykje regn torsdag og starten av fredag.

Nord-Troms og Finnmark ligg på den kalde sida av skiljet, og vil få rundt 10–15 grader. Men her kan det bli sol mange stader, så sommarleg kan det bli likevel.

Aust- og Sørlandet som har hatt fint vêr den siste veka, kan vente seg meir av det dei neste dagane. Der er temperatur-toppen venta nærare laurdag.