På grensa til ekstremvarsel

Kan komme enorme mengder regn på Sør- og Austlandet frå tysdag kveld til torsdag.

regn

Det blir ein klissvåt start på hausten når årets første haustlege uvêr kjem inn over Sørlandet tysdag kveld.

Foto: prozaciswack/flickr

Meteorologane vurderer fortløpande omfanget av uvêret som kjem. Blir det ekstremvêr, eller berre eit skikkeleg ruskevêr?

– Vi opprettheld ekstra overvaking for Vestfold, Buskerud, Telemark og Aust-Agder og Oppland, fortel statsmeteorolog John Smits.

Fase A-varselet (sjå faktaboks) gjeld eit mindre område enn det vart varsla i går. Det er fordi dei no er meir sikre på kvar det meste av nedbøren vil kome.

For dei øvrige fylka gjeld framleis OBS-varselet som vart sendt ut i går.

Meteorologane held ekstra oppsyn med områda der vêret skal treffe og det kan bli sendt ut ekstremvarsel dersom meteorologane trur vêret utgjer fare for liv og verdiar.

Det er enno ikkje sikkert at det faktisk blir ekstremvêr, og meteorologane vil oppdatere varsla utover dagen.

Onsdag blir det nettmøte med NVE og meteorologane om pøsregnet frå klokka 11-12. Du kan sende inn spørsmål allereie no!

Venta å bli våtast i Telemark, Buskerud og Vestfold

I går vart det sendt ut OBS-varsel for fleire austlandsfylke. OBS-varsla gjeld framleis, men sidan lågtrykket er kraftig krevst også meir overvaking.

– Vi kan sjå at det blir mykje nedbør over heile det austafjelske, men det ser ut til at maksimumsnedbøren kjem i Telemark, Buskerud og Vestfold, fortel statsmeteorolog Antia Ager-Wick.

Eit viktig grunn til at meteorologane anbefaler folk å vere obs på vêret som kjem, er at det skal regne mykje over lengre tid.

Det er venta å komme lokalt 70–90 mm regn i løpet av dei neste 24 timane, og 80–110 mm i løpet av dei neste 36 timane.

Men meteorologen fortel at det er framleis uvisse i prognosane, og anbefaler folk å følge med på meteorologane på Twitter, i media og på Yr.no utover dagen.

Som John Smits skreiv i eit Facebook-innlegg i går, er det spesielt i plasseringa av lågtrykket usikkerheiten ligg:

Ulike nedbørsscenario

I figuren vises fire moglege scenario av nedbørsfordelinga kl. 14 tysdag til kl. 02 natt til onsdag (12 timsr). I dei raude områda er nedbøren mest intens, skriv John Smits om vêret som kjem.

Foto: Meteorologisk institutt

Aukar jamt og trutt

– Det vil regne jamt og trutt fram til onsdag kveld, så kan vi vente oss kraftigare regnbyer, fortel Anita Ager-Wick.

Ho fortel at nedbøren i første omgang ikkje er dramatisk. Dei som er ute på vegane må vere merksame på fare for vassplaning, og det vil bli auka vasstand i småbekkar og elver.

Utover veka kan faren for lokale flaumar auke, og det er lurt å sjekke NVE sitt flaumvarsel på varsom.no.

Oversvømmelse Jevnaker

Slik kan det sjå ut på vegane om prognosane slår til. Køyr forsiktig!

Foto: Inger Johanne Sollie / NRK

Ikkje gløym vinden

Det er regnet som er hovudårsaka til meteorologane sin ekstra overvaking av vêret. Men det kjem også vind, minner meteorologen oss på.

Vestfold, Østfold og Akershus kan få vindkast opp mot 20 meter i sekundet.

Medan nordlege fjellområde går klar av ruskevêret, vil det merkast i form av vind og litt nedbør i sørlege delar av langfjella.

Også Vestlandet vil merke sterke vindkast frå aust, så rydd inn hagemøblar og trampolinar så dei ikkje får ein litt for luftig start på hausten.