Meteorologen: Kan bli liten storm langs kysten

Det går frå sol til liten storm for nokre, og andre kan få ny rekord i lite oktobernedbør.

Det blir ikkje kjedeleg på vêrfronten denne helga!

• Følg med på meteorologane sitt tekstvarsel for oppdatert varsel i helga.

– Det blir ei vindfull helg

Fredag startar bra både for Vestlandet, Trøndelag og Nord-Noreg. Og det held seg fint, heilt til frontane kjem inn frå Norskehavet og endrar stemninga.

Finvêrsfesten tek først slutt sør på Vestlandet. Allereie fredag ettermiddag er det venta kuling og litt regn, og mot kvelden når det også Møre og Romsdal.

– Det vil merkast etter det fine vêret vi har hatt, seier Mette Skjerdal ved vêrvarslinga i Bergen.

Men det er laurdag det slår til for fullt på Vestlandet. Vinden aukar på heile dagen, og det kan komme opp i liten storm langs kysten.

– Spesielt Sogn og Fjordane vil merke vinden, seier meteorologen.

Lågtrykket held fram mot nord, og der det har gått forbi blir vêret lettare. Natt til søndag står Trøndelag for tur.

Og forresten, det blir ikkje berre vind. Lågtrykket kjem også med regn og regnbyer der det fer forbi.

Les også:

• Er det større sjanse for stormer om høsten enn om våren?
• Difor er dette surferane si favorittid

Nord-Noreg sin tur på søndag

Nord i landet har veka vore prega av sludd og snø. Men starten på helga blir fin også der, før det før nemnde lågtrykket kjem sørfra med regn og vind. Ein liten smak kjem til Nordland og Troms allereie laurdag.

– Men vi får det mest markante vêret søndag, fortel statsmeteorolog Trond Lien.

Søndag kan det bli sterk i Nordland og Troms, med kuling og kanskje storm langs kysten. Dette blir akkompagnert med regnbyer i låglandet og snøbyer i fjellet.

Finnmark ligg betre an. Der kan laurdagen bli ganske fin, medan søndag kan vinden trekke inn over Vest-Finnmark.

Blir det oktober-rekord?

Oktober kan bli rekordtørr for nedbørsstasjonen på Blindern. Men rekorden er avhengig av at lågtrykket som gir ei våt og vindfull helg til resten av landet ikkje klarar å strekke seg over fjella og inn i storbyen.

– Eg trur Oslo slepp unna, kanskje blir det litt yr, seier Siri Wiberg Horjen ved Meteorologisk institutt i Oslo.

Enn så lenge ser det ut til at nedbøren dett ned rett over Langfjella, altså vest i Agder, Telemark, Buskerud og Oppland.

– Vi kryssar fingrane og håpar på rekord, avsluttar Wiberg Horjen.