Kvifor er det «veger» i vatnet?

Hei Inger, og takk for spørsmålet!

Slike striper eller vegar i vatnet kan forklarast med sirkelrørsle i vatnet (langmuir sirkulasjon).

Oppsamling av vatn

Kva er langmuir sirkulasjon?

Nokre gonger kan vinden føre til at det oppstår celler av roterande vatn parallelt til vassoverflata, sjå figur under.

Desse cellene skaper oppsamling av vatn (konvergens) og område kor vatnet strømmer utifrå (divergens).

Dette sirkulasjonsmønsteret kan utvikle seg raskt (i løpet av nokre minuttar) når vinden er over 3 meter i sekundet.

Sirkulasjonen fører til at ein får danna ein strøm frå divergenssona til konvergenssona.

I konvergenssona vil det samla seg partiklar, flytande tang og skum og ein ser striper i vatnet.

Aksane til spiralrørsla er nesten parallelle med vindretninga.

Avstanden mellom konvergenssona og divergenssona varierer mellom 15 til 300 meter, og banda kan bli fleire kilometer lange.

Spiralrørsla er typisk ein 4-6 meter djup. Sirkulasjonen kan dannast raskt, og varar frå nokre minutt til fleire timar.

Helsing Haldis