Normal

John Smits fekk rekorden han venta på

Meteorologisk institutt fekk den tørraste oktoberen sidan 1947.

Haust

Oktober har gitt 60 prosent av normal nedbør. Det har altså vore ekstra mange sjansar til å nyte hausten i mildt og tørt vêr!

Foto: @margretesolvi / Instagram

John Smits og gjengen på Meteorologisk institutt i Oslo håpa på ny minimunsekord for nedbør i oktober. No er månaden forbi og rekorden vart eit faktum med 8,3 mm på heimebana Blindern.

John Smits

John Smits kryssa fingrane for ny minimumsrekord for nedbør på Blindern. Det gjekk som han håpa!

Foto: Kaland, Ole / Ole Kaland, NRK

I gjennomsnitt var landet både tørrare og varmare i oktober enn vi er vande med. Men nedbøren var slett ikkje jamt fordelt:

1. Her var det tørt.

Det var ikkje berre Blindern som hadde det tørt i oktober. Nokre stasjonar fekk mindre enn ein fjerdedel av normal mengde regn, dei fleste på Austlandet.

På Blindern går målingane tilbake til 1937. Hadde dei gått lenger tilbake i tid, kunne rekorden hengt i ein tynn tråd. Det skal mykje til å slå minimumsrekorden frå 1920, ifølge statsmeteorolog John Smits.

– Dei aller fleste stasjonane som har målingar så langt tilbake har rekorden sin akkurat dette året. Vi kan grovt anslå at åkrane på Blindern fekk omtrent 3 mm, fortel Smits.

Stasjonen Dombås-Nordigard i Oppland fekk berre skarve 2,1 mm, berre seks prosent av nedbøren dei er vant til å få!

2. Men «Roar» gjorde det vått for nokre

Ekstremvêret «Roar» som råka i starten av oktober, kan ta på seg mykje av den tvilsomme æra å ha gjort oktober våtare enn normalt i Trøndelag og Nordland.

Vêret kom med mykje av regnet som utgjer den våte statistikken. Nokre stader var det meir enn 1,5 gonger av normalen. Her var det våtast:

  • Åfjord – Momyr (Sør-Trøndelag) – 451,9 mm (175 prosent av normalen)
  • Lurøy (Nordland) 428,5 mm (108 prosent av normalen)
  • Sortland – Kleiva (Nordland) 348,3 mm (170 prosent av normalen)
    Nedbør oktober

    Blått betyr meir nedbør enn normalen, medan gult betyr mindre. Trøndelag og Nord-Noreg fekk det meste av nedbøren som ramla ned over Noreg i oktober.

    Foto: Meteorologisk institutt

3. Uvanleg varmt i Arktis

Heile vårt langstrakte land låg 1,2 grad over normalen. Varmast var det i Møre og Romsdal og Trøndelag, der temperaturen låg 2–3 grader over det vi ventar oss av oktober.

Men også Arktis hadde ein uvanleg varm haustmånad. Svalbard lufthamn hadde ein gjennomsnittstemperatur på -1,8 grader, og det er 3,7 grader over det som er vanleg.

Også Bjørnøya låg 2 grader over det normaltemperaturen. Alt i alt var heile det arktiske området av Noreg godt over normaltemperaturen denne oktober-månaden.

Temperatur for oktober

På landsbasis låg vi 1,2 grader over normalen. Varmast var det i Møre og Romsdal og Trøndelag, kanskje hadde spelte siste oktoberdagen i Ålesund inn?

Foto: Meteorologisk institutt

4. Difor var 31. oktober ein spesiell dag

Ikkje fordi barn sprang rundt i gatene kledd som spøkelser og piratar på jakt etter godteri, men fordi denne dagen var både den varmaste og den kaldaste i månaden.

Den varmaste temperaturen målt i oktober var 21,5 grader på Bingsa (Ålesund, Sunnmøre), og gav det vi kallar «indian summer».

Den kaldaste temperaturen vart målt i Chuovddatmohkki (Karasjok, Finnmark). Der var det -14,1 grader den siste dagen i oktober.