yr.no-lesar Berit frå Østfold lurer på om det stemmer at når ein har vinden i ryggen, er lågtrykket med regn og skitvêr til venstre, og høgtrykk med sol og godvèr til høgre.
Jan Solberg har høyrt på maritim vervarsel i sommar, og undrar seg over at det blei snakka om lågtrykk på 1019 hPa.
Han lurer på om ikkje skiljet mellom høgtrykk og lågtrykk går ved normaltrykket på 1013 hPa.
Hei og takk for spørsmåla.
Ja, det stemmer at når ein har vinden i ryggen, er lågtrykket til venstre, og høgtrykket til høgre for oss.
Høgtrykk har vi der lufttrykket er høgare enn omgjevnadane. Og lågtrykk der lufttrykket er lågare enn omgjevnadane.
Som regel betyr høgtrykk sol medan lågtrykk gjev grått og vått ver.
På den nordlege halvkule bles det mot klokka rundt eit lågtrykk, og med klokka rundt eit høgtrykk. Slik at når du står med vinden i ryggen vil du ha gråveret til venstre og finveret til høgre.
Om trykket i eit lågtrykk
I gjennomsnitt er lufttrykket ved havoverflata 1013 hPa (hektoPascal), og dette blir også kalla normalt lufttrykk. Som oftast er vi nærmast eit høgtrykk når trykket er over 1013 hPa.
Det lågaste lufttrykket som er målt i Norge er 940 hPa og det høgaste er 1061 hPa.
Nokre gongar omtalar vi lågtrykk som har høgare trykk i senteret enn 1013 hPa. Dette er likevel eit lågtrykk fordi det har lågare trykk enn omgjevnadane.
Vindretningane rundt eit lågtrykk er alltid dei same sjølv om trykket i senteret ikkje er under 1013 hPa. Når vi oppgir plassering av lågtrykk og høgtrykk, er det for å forklare kva vindretning som er venta.
Sjeldan storm om sommaren
Eit lågtrykk på for eksempel 1019 hPa er gjerne enten i startfasen av lågtrykksutviklinga, eller eit gammalt lågtrykk.
Om sommaren er ofte lufttrykket i senteret av eit lågtrykk høgare enn om vinteren.
Dei horisontale trykkskilnadane er som regel mindre om sommaren, og dermed blir ikkje vinden så sterk som om vinteren.
Men ein sjeldan gong blir det storm om sommaren også.
Sommarhelsing frå Merete.
- Barometer:
Fleire spørsmål til meteorologen: