Snøen har begynt å legge seg i fjella frå sør til nord, men den får ikkje krype langt nedover fjellsidene før snø snøfnugg blir til regndropar.
Dei siste tre vekene har lufta vore usedvanleg mild frå Kristiansand i sør til Honningsvåg i nord.
Held det fram slik blir det varmerekord i november, er beskjeden på Meteorologisk institutt.
Relativt varmast i Trondheim
Statsmeteorolog Aurora Stenmark ved Meteorologisk institutt tok ein kikk på temperaturstatistikkane for dei siste vekene. Heile landet har hatt veldig mildt vêr, kan ho melde.
– Det er størst avvik frå normalen i Sør-Noreg, i Tromsø hadde det vore litt meir variabelt. Men også der har det vore mildt, seier Stenmark.
Av Honningsvåg, Tromsø, Trondheim, Bergen, Stavanger og Oslo kjem trønderhovudstaden relativt mildast ut.
I Trondheim duppa temperaturen under normallinja ein gong heilt i slutten av oktober, elles har den heldt seg over. Middeltemperaturen har vore 3,5 grader over normalen.
Kvifor så varmt?
– Vi ligg på den milde sida av polarfronten, forklarer Stenmark. Polarfronten er skiljet mellom kalde luftmassar i nord, og varmare luftmassar i sør.
– Lågtrykksaktivitet har teke med seg mild og fuktig luft frå sør og sørvest. Sjølv oppe i nord har det vore mildare luft, der også har det vore lågtrykksaktivitet.
Ho poengterer også at fleire byane ho har laga statistikk over ligg langs kysten, og då er dei ekstra utsett for å bli treft av lågtrykka. Høgare oppe i fjellet er det snø, forklarer meteorologen.
- Les også:
Høgtrykk kan gi vinteren eit puff
Om du er ein av dei som ventar på den kaldare tida, er det høgtrykk du skal krysse fingrane for:
– Eit høgtrykk hadde hjelpt, for det stoppar lågtrykksaktiviteten og då blir det gjerne kaldare, forklarer meteorologen. Vêret blir ofte klart og kaldt i samband med høgtrykk om vinteren.
– I dag tidleg var det is på bakken i Oslo. Sjølv om det eigentleg er ganske mildt, er det klart, og då blir det større varmetap frå bakken. I tillegg er dagane korte og sola varmar mindre, forklarer Stenmark.
Langtidsvakta ved Meteorologisk institutt, Mariann Foss, kan fortelje at helga blir kvitare i sør.
– Det er venta ei kaldare helg, i alle fall laurdag og søndag, fortel langtidsvakt Mariann Foss ved Meteorologisk institutt.
Snøgrensa søkke ned til 6–700 moh. laurdag og søndag. Men med måndag kjem den milde lufta tilbake.
I nord er det generelt litt kaldare enn her i sør, men også der vil temperaturen variere med lågtrykka, melder Foss.