– Aldri hatt det så varmt i november før

Rekordane blei sett onsdag ettermiddag og er:

• 19,2 grader på Kråkenes fyr i Sogn og Fjordane
• 18,3 grader i Etne i Hordaland

Inntil onsdag ettermiddag var 17,9 Hordalands-rekorden. Den blei sett i november 2011 ved målestasjonen Florida i Bergen sentrum. I nabofylket i nord var fylkesrekorden frå Lærdal på 18,7.

Til saman er det sett ei rekkje varmerekordar for å vere november.

Varmt, kaldt og så rekordvarmt

– Eg merka at eg hadde på meg ein altfor tjukk jakke. Har aldri opplevd ein novemberdag som denne, seier Aslak Sverdrup, lufthavndirektør ved Bergen lufthavn Flesland.

Klokka 06 onsdag morgon kom dagens første varmerekord for november. Då hadde temperaturen allereie kome opp i 16,4 grader på flyplassen. Varmast sidan målingane starta på denne vêrstasjonen for 63 år sidan.

Målestasjonen Florida i Bergen sentrum hadde 16,9 grader klokka 6 onsdag morgon. Det er nøyaktig ein grad mindre enn fylkesrekorden frå 2011. Men dagen var langt frå over, og meteorologen hadde tru på at rekorden kunne ryke.

Og så skjedde det. Etter at temperaturen sokk drastisk onsdag føremiddag steig den til nye rekordar om ettermiddagen. Mellom klokka 13 og 14 sette målaren på Gullfjellet ny fylkesrekord for makstemperatur i november.

– Då blei det målt 18,1 grader der, fortel statsmeteorolog Geir Ottar Fagerlid.

Men rekorden sto berre nokre få timar. Då gjekk temperaturen i Etne forbi.

– Ein typisk sommardag

Ved Florida er dagens høgaste målte temperatur 16,9 grader. Det er den tredje høgaste temperaturen målt i Bergen sentrum nokosinne.

– Dette er jo ein typisk sommardag på Vestlandet. Alle kan nok hugse jonsokkveldar (23. juni) med berre 10–12 grader, så dette er fine temperaturar, meiner Fagerlid.

Det er føn-effekten som gjera at temperaturen varierer kraftig. Vindretninga må vera den «rette» for at temperaturen skal bli høg.

LES OGSÅ: Fønvind gjer forskjell på folk

Store skilnader mellom ytre og indre strok

I indre strok av Hordaland er temperaturen heilt nede i 5–6 grader. Til dømes i Odda. Det same skjer i Sogn og Fjordane der Bremanger i ytre strok onsdag morgon hadde temperaturar oppe i 16–17 grader, medan det er minusgrader i Jostedalen.

– Det er veldig store forskjellar. Føn-effekten slår ikkje til alle stader. Men vi forventar at temperaturen skal stige kraftig også i Møre og Romsdal i dag. Der er det under ti grader no, men effekten har ikkje slått til enno på fønvind-stad nummer ein i Noreg, Tafjord, fortel Fagerlid.