Yr-brukar Lars Vangdal Tveisme merka seg at temperaturprognosane for Norheimsund i Hordaland var blitt moderert, og difor spør han:
– Kvifor får vi ikkje full effekt av varmlufta?
Skilnaden er fønvind
Ein fønvind er ein varm og tørr, ofte kortvarig, vind som fell nedover en fjellside, på motsett side av fjellet frå der vinden kjem frå (losida).
Når lufta fell ned på denne måten, vert ho og pressa saman. Dette aukar temperaturen i lufta. Temperaturauka kan vere veldig kraftig, særskild dersom lufta i høgda er varm i utgangspunktet.
Indian summer med fønvind
I Tafjord i Møre og Romsdal hadde først hausten meldt seg, men i haustferien byrja temperaturen å stige.
Det var allereie mildt, men natt til søndag 14. oktober skjedde det: Temperaturen steg frå 10,9 til 25,1 grader på berre ein time! Vi ser at denne dramatiske auka skjedde samstundes med at vinden dreia 180 grader, og auka på frå sør-søraust.
Her er det tydeleg at føneffekten har slått til. Allereie varm luft i høgda vert pressa ned, og dermed varma opp ytterlegare. Synkande luft vil og tørke opp, som vi tydeleg kan sjå på målingane.
Indian summer utan fønvind
Det er typisk at det er i Møre og Romsdal vi ser dei største temperaturhoppa som kan knytast til fønvind. Det er fønvind andre stader i landet og, men då gjerne ved andre vindretningar. I Møre og Romsdal er det vind frå sør og søraust som gjeld, og desse vindane er ofte varme i utgangspunktet.
Norheimsund i Hardanger ligg ikkje like gunstig til for å få fønvind når det er sønnavind. Ved kraftig vind frå aust, derimot, er det Vestlandet sør for Stad som er mest utsett.