Ny yr-rekord: 1,65 mill. brukarar

yr.no vart offisielt lansert i september 2007, og nettstaden har på rekordtid blitt blant dei mest brukte norske nettstadene.

Bruken av yr.no har auka jamt heilt frå starten, med store hopp no når sumarsesongen nærmar seg. I førre veke var 1 656 369 unike brukarar innom yr.no, i fylgje tal frå TNS Gallup.

– Vi ser at sumaren er høgsesong for vêrvarsel, fortel informasjonsrådgjevar Kristin Goa ved Meteorologisk institutt.

– I fjor sumar steig òg bruken av yr.no kraftig, og vi passerte ein million brukarar for fyrste gong rett før sumarferien i fjor. Det er fyrst og fremst når det er ustabilt vêr at mange kjem innom yr.no: når tek regnet slutt, og vil det bli godt vêr til helga er vel dei vanlegaste spørsmåla folk lurar på, fortel Goa.

På det meste er det rundt 500 000 unike brukarar innom yr.no på éin dag.

Populært på nett og iPhone, lite brukt på vanleg mobil

Mobilversjonen av yr.no – m.yr.no – vart lansert seint på hausten i 2008, og har ikkje blitt oppdaga av så mange brukarar til no.

– I dag er det rundt 5000 mobilbrukarar som er innom m.yr.no på ei veke, vi har vore oppe i 10.000 brukarar i veka i påska, men vi ser at dei fleste har meir sans for dei vanlege nettsidene enn dei litt forenkla mobilsidene, seier Anders Hofseth, fungerande redaktør for yr.no.

m.yr.no vart lansert som eit tilbod til mobilbrukarar som ville ha enklare og billegare måtar å hente vêrvarsel på. Ein vanleg mobilbrukar må betale rundt 10 kr til teleselskapet sitt for å laste ned ei vanleg yr.no-side via telefonen (det er mange store og tunge kart som gjer at rekninga blir høg), medan ei side på m.yr.no kostar rundt 20 øre. Alle mobitilboda på yr.no er gratis – ein betaler berre for trafikken til teleselskapa.

– Det store lyspunktet på mobilfronten for yr.no er iPhone-applikasjonen vår, fortel Anders Hofseth, fungerande redaktør for yr.no. Rundt 50 000 norske iPhone/iTouch-brukarar har lasta ned yr.no-applikasjonen, og dei brukar sjekkar vêret via iPhone rundt fem gongar i veka.

yr.no-applikasjonen er den mest populære norske iPhone-applikasjonen. Dersom du har iPhone eller iTouch kan du enkelt laste han ned via iTunes. Les meir om yr.no på iPhone

Mange svenskar brukar yr.no

yr.no har etter kvart blitt svært populært i dei andre nordiske landa òg. I førre veke var det 719.000 brukarsesjonar («påloggingar») frå Sverige, dette svarar til rundt 180 000 unike brukarar.

– Det er fyrst og fremst nordmenn som brukar yr.no, fortel Liv Braathen i NRK si analyseavdeling. 83 prosent av brukarane kjem frå Noreg, 11 prosent frå Sverige; medan Danmark, Storbritannia, Tyskland og USA står for omtrent 1 prosent av bruken kvar. 2 prosent av brukarane kjem frå andre land, spreidd over heile verda.

Dei fleste brukarane kjem til yr.no direkte: 87 prosent tastar inn yr.no i nettlesaren direkte (eller brukar eit bokmerke). Rundt 10 prosent kjem til yr.no via søkjemotorar eller portalar, og 3 prosent kjem via lenker frå andre nettstader.