Nordmenn er generelt opptekne av vêr. Kanskje gjer varierande, norsk sommarvêr oss ekstra ivrige på å finne ut om det er sol eller regn i vente dei neste dagane.
Ein million fleire enn same veke i fjor
Brukarrekorden vart målt i veke 28. Til samanlikning hadde yr.no 8,1 millionar individuelle brukarar same veke i fjor.
Rekordveka baud i år på blant anna flaumfare på Vestlandet, fint vêr i nord og regnbyer i aust.
Og slik kan vêret i stor grad skildrast denne sommaren – stor variasjon. Men nokre kjenner seg kanskje litt snytt for sommardagar.
Til dømes registrerte Meteorologisk institutt årets 38. sommardag på Blindern 27. juli. I 2014 hadde dei hatt 64 dagar med temperaturar over 20 grader på same tidspunkt.
Aust- og Sørlandet er nok ikkje dei områda som har kome verst ut av denne juli-månaden, for det har vore fleire ullgenserar i omløp andre stader i landet denne sommaren.
No har vêrbiletet blitt snudd opp ned
.. i alle fall for nokre dagar. For tysdag var det Nord-Noreg som toppa temperaturlistene.
Aust- og Sørlandet fall utanfor denne lista, mykje på grunn av eit lågtrykk med regn og torevêr som ført til obs-varsel og mykje nedbør.
Medan regnet gjer det kjøligare i sør, ser temperaturane i nord ut til å halde seg opp under 20-talet eit par dagar framover.
Trass i at det kjem inn ein front med skyer og litt regn.
Faktisk kan statsmeteorolog Eirik Samuelsen fortelje at snittet av makstemperaturane i Tromsø-regionen har vore litt over normalen sidan midten av juli, og det er slettes ikkje ille!
– Men både Nordland og på kysten av Finnmark har det vore litt kaldare, legg han til.
Også Vestlandet og Trøndelag har fått litt av det fine vêret dei siste dagane, men no kjem regnbyene som pregar Austlandet også til resten av Sør-Noreg.
Gir varierande vêr ekstra yr-trafikk?
Som denne veka, har sommaren vore prega av store kontrastar og uforutseielege regnbyer som ikkje alltid dukkar opp på yr.
Overraskande nok tiltrekk ikkje nedbørsradaren og vêrkartet så mange av dei ni millionane. Då må vi riste litt på hovudet i yr-redaksjonen.
For høyr her: Meteorologane sitt beste tips for å forutsjå regnbyer som kjem overraskande om sommaren, er å følge med på vêrradar og verkart. Der ser du betre når regnet treff der du er.
Ha ein god yr-sommar, og ta med deg desse tipsa neste gong du klikkar deg inn: Slik får du et best mogleg værvarsel.