63 år gammal troperekord knust

Sommaren i Sør-Noreg har tatt knekken på nok ein rekord. Og enno er vi berre i midten av juli!

Bading på Borestranda

SYDENVARME: Det er tropedagar i lufta, og badetemperaturane konkurrerer også med sørlegare strøk.

Foto: Pål Berg Mortensen / NRK

Sola gjev ikkje Sør-Noreg fred. Ho held fram med å skine, og har smelta nok ein rekord.

På søndag kunne vêrstasjonen i Gulsvik i Buskerud måle 30,7 grader. Dermed var den 20. tropedagen i år eit faktum. Så mange har det ikkje vore i same kalenderår på 63 år.

– Dette er ingen vanleg sommar i Sør-Noreg! Det vert sett så enormt mange varmerekordar, seier statsmeteorolog Ida Fossli.

Førre rekord var frå 1955. Då registrerte Kongsberg 18 tropedagar.

Kva rekord stod for fall?

Medan Meteorologisk institutt tek utgangspunkt i rekorden frå 1955, meiner vêr-statistikar Bernt Lie at det er ein endå eldre rekord som vart forbigått i går.

– Den førre rekorden var 117 år gammal. Desse dataa er ikkje digitalisert, men om vi går inn i protokollen frå Oslo, så ser vi at det var registrert 18 tropedagar i juli og to i august i 1901, seier Bernt Lie.

Bernt Lie

IVRIG: Bernt Lie har vore ein ivrig vêr-statistikar sidan 1965.

Foto: Morten Krogstad / NRK

Han hevdar såleis den førre rekorden var på 20 dagar i 1901.

Meteorologisk institutt reknar dette som ei feilmåling, og at vêrstasjonen i Oslo truleg var strålingspåverka.

Uansett kva rekord ein sette sin lit til, så vart den på søndag knust. Det spørst kor lenge den flunkande nye rekorden varer.

Kan verte fleire tropedagar

– Det er mogelegheit for tropedag i dag òg. Temperaturane er veldig like så langt, men det er umogeleg å seie for sikkert, seier statsmeteorolog Ida Fossli.

Ida Fossli

SOMMARVÊR: Heile landet får fint vêr i løpet av veka som kjem, seier statsmeteorolog Ida Fossli.

Foto: Hanneke Luijting / MET

Samstundes er vi berre halvvegs i sommarmånaden juli, og det vert nok ingen store vêrendringar den nærmaste veka.

– Tendensen er framleis at det vert varmt og tørt, seier Fossli.

Det høgtrykket som har prega vêret dei siste to månadane vert ikkje jaga vekk med det første. Bernt Lie har i alle fall tenkt å følgje spent med framover.

– Eg gjer det med den største entusiasme! Det er interessant å følgje med om Gulsvik eller eit par andre stadar i Buskerud kan halde fram med tropedagar. Når det først skal vere så gale tørke, kan ein gjerne setje nokre nye rekordar.

Nærmaste utfordrar er Sigdal, som med sine 19 tropedagar også har slått rekorden frå 1955. Den seinaste tropedagen i Noreg var 26. august i 1947. Lie trur det er sjanse for at også denne rekorden ryk før sommaren er på hell.

– Tenk om vi i september kunne oppleve norsk tropevarme. Det ville vore ein sensasjon, seier Lie.