Vinden snur i helga, for dei aller fleste. Polare lågtrykk får meteorologane til å klø seg i hovudet, for desse er nokre små, uforutseielege, ustabile lågtrykk.
– Det som er sikkert, er at det blir snøbyer frå Nordfjord og nordover, seier meteorologen.
Iskald arktisk luft
BODØ: Børvasstindane kan få eit tjukkare lag med snø i løpet av helga. Det kjem litt an på kvar snøbyene treff, men der det blir mest kan det komme mellom 10–30 centimeter i Nord-Noreg.
Foto: @saikofriend / InstagramEin kald luftstraum hamnar over landet i helga. I desse kalde luftmassane kan føre med seg polare lågtrykk. Dei er små og intense, blir danna i iskald arktisk luft, og har ein tendens til å gi mykje snøbyer og sterk vind, forklarer statsmeteorolog Gunnar Noer.
– Dei kan gi brått skiftande vër, og er eigentleg ganske farlege lågtrykk. Det gå frå å vere heilt klart og fint til å bli snøfokk og storm på små minuttar, åtvarar Noer.
Prognosane for akkurat kvar lågtrykka vil plassere seg er usikre, og meteorologen anbefaler å følge med på vêrmeldinga kontinuerleg.
Vêret vil vere prega av pålandsvind langs kysten, og det kan bli ein del sludd- og snøbyer stort sett i heile landsdelen. Det kan bli mellom 10–30 centimeter snø i løpet av heile vêrhendinga, fortel meteorologen.
– Du bør vere forsiktig med å reise ut i småbåt, og vere OBS om du bur utsett til for vêr. Også i fjellet, for det kan skifte veldig fort.
I all hovudsak vil vinden kome frå nordleg retning. Men om desse små polare lågtrykka slår til, vil vinden plutseleg komme meir frå vest og snøbyene blir kraftigare. Dette gjeld heile vegen ned til Nordfjord, fortel meteorologen.
I hovudsak vil vêret vere prega av sludd- og snøbyer og sterk vind. Innimellom kan det blir klart og fint, så stikkordet er skiftande.
– Det som er sikkert, er at det blir kaldt! Konkluderer Anne Mette Olsen ved vêrvarslinga på Vestlandet.
POLARE LÅGTRYKK: Dei er nokre ustabile snikar, og forvirrar både vêrmodellar og meteorologar. Det vi veit er at det blir snøbyer, vind og vêr som kan skifte på eit blunk frå Vest-Finnmark til Nordfjord i helga. Aust-Finnmark ligg an til meir stabile tilhøve.
Foto: Meteorologisk instituttHer kjem sola!
Dette kan bli helga for dei store kontrastane. Sør for Nordfjord vil det i hovudsak vere opphaldsvêr og sol heilt fram til søndag, med mindre dei polare lågtrykka bestemmer seg for å ta ein svipptur lenger ned.
– Blir det byer her kjem det i alle fall som snø, konkluderer meteorologen.
Også Austafjells er det sol og kvite skogar i vente. For dei som lengtar etter å teste skia i nypreppa løyper, blir det midt i blinken! Stikkorda er kulde, lettskya og lange periodar med sol.
– Tidlegare i veka har det komme eit par porsjonar snø i dalstrøka i aust, og no er det også komme som snø i sørlege område. Det som har komme vil bli liggande gjennom helga, lovar Per Egil Haga ved Meteorologisk institutt i Oslo.
Med kald luft frå nord og lite skyer, er det kuldegrader i vente.
– Det kan bli minus 5–10 grader om nettene i helga, kan Haga melde.
KLARDT OG KLART: Det kan bli fleire sjansar til å nyte solnedgangar som denne ein Yr.-brukar fanga på Aker Brygge i helga.
Foto: @jelorent / Instagram
