Meteorologane varslar uvêrsjul på Vestlandet, og meteorologen har eitt tips:
– 1. juledag er det ikkje vits å gå ut døra, sa statsmeteorolog Geir Ottar Fagerlid til NRK i morgontimane vesle julaftan.
Verst i vest, igjen
Sogn og Fjordane ligg mest lagleg til for hogg for denne runda med storm, men også Hordaland, Møre og Romsdal og Trøndelag vil få ruskete julevêr.
Julefeiringa smell i gang vesle julaftan med bygevêr. I byene kan det vere både regn og hagl, og truleg torevêr. Over om lag 600 meter vil det komme snø.
Skal du køyre over fjellet 23. desember må du vere budd på vanskelege køyretilhøve på grunn av snø og kraftig vind.
- Les OBS-varsel for vanskelege køyretilhøve i fjellet
På føremiddagen julaftan kjem den første av to julestormar. Då er det venta sterk kuling og opp til full storm ved Stad. I tillegg skal det regne mykje.
Verst natt til 1. juledag
INGEN JULEFRED: Meteorolog Geir Ottar Fagerlid har ingen julefred å bringe til Vestlandet i vêrmeldinga vesle julaftan.
Foto: Meteorologisk InstituttI Hordaland ligg det an til vestleg liten storm utsette stader 1. juledag. Den kraftigaste vinden er venta om ettermiddagen i alle vestlandsfylka. Sterkast vil vinden vere rundt Stad og på Sunnmøre.
– Natt til første juledag skal det blåse opp mot full storm, sterk storm ved Stad, kanskje til og med orkan, sa Fagerlid til NRK i morgontimane vesle julaftan.
Då kjem vinden i sørvestleg retning, altså parallelt med kysten.
Utover ettermiddagen 1. juledag vil vinden spakne, og dreie på nordvestleg retning.
Likevel er den farlegare, fortel meteorologen.
– Når vinden kjem frå vest og nordvest trenger den inn i fjordane og i fjellet. Då har den større skadepotensial, forklarar Fagerlid.
Vindkasta kan komme opp i 30–33 meter i sekundet, og i tillegg er det venta kraftige byer.
Vinteren kjem 2. juledag
Den gode nyheita er at temperaturen er på veg ned. Når vi vaknar 2. juledag kan det vere minusgrader og kvitt på bakken ned til 2–300 meter både på Vestlandet, i Trøndelag og Nord-Noreg.
Også i nord blir sjølve høgtida prega av mildvêr og sterk vind. Om ettermiddagen julaftan kan vinden kome opp i liten storm utanfor Lofoten.
Men 1. juledag kjem vinteren. Då er det stort sett snøbyer i Nordland, Troms og Finnmark.
Også på Sør- og Austlandet er det mildt og vindfullt julaftan. Der kan ein vente seg kuling utsette stader, samt liten storm i høgfjellet. På denne kanten kjem vintervêret også 1. juledag. Ikkje i form av snø, men litt kaldare i lufta blir det!
JA TAKK: Det er denne type julebilde mange ventar på. Frå andre juledag går vi meir i den retninga, fortel meteorologen. Men utover romjula er den varme lufta venta å komme tilbake. Vi får krysse fingrane for at prognosane snur!
Foto: @grojo83 / Instagram
