Solfylt haustveke i sør

Kvite toppar og haustfarga fjell har prega bilda frå nord på Yr.no/bilder i helga. Også blå himmel har vore å skimte, men det blir det dessverre mindre av denne veka.

Medan det i sør vil bli mykje sol denne veka, blir det ruskete haustvêr i nord, fortel meteorologane.

«Sørvesten» gir ruskevêr i nord

Mathilde Hallerstig ved vêrvarslinga Tromsø har ei kort oppsummering på vêrveka i nord:

– Det blir sørvestleg vind og regn heile veka.

Lågtrykk etter lågtrykk vil passere, og det blir rett og slett stabilt vått og grått. Og slik vil det halde seg mot helga, syner prognosane.

For dei som ventar på snøen på fjelltoppane, er nyheitene heller ikkje særleg gode. Meteorologen fortel at du må langt inn i indre strøk eller høgt opp på toppane for at temperaturen skal vere låg nok til at nedbøren kjem i fast form.

– Det er rett og slett litt stussleg haustvêr, konkluderer meteorologen.

Sol i sør

Eit høgtrykk har lagt seg til rette som eit belte over Sør-Noreg. Det kjem til gode for områda Austafjells og sør på Vestlandet.

Der blir denne veka prega av sol og temperaturar rundt ti grader. Slettes ikkje verst haustvêr! Men det blir ikkje berre sol frå skyfri himmel. Har du opplevd at Yr.no melder strålande sol, men når du kikar ut vindauget om morgonen er utsikta sperra av tåke?

Fenomenet er kalla strålingståke, og det kan fort prege morgonane i Sør-Noreg denne veka, fortel meteorolog Espen Biseth Granan.

– Det er vanleg med strålingståke om hausten. No har vi roleg vêr og lite vind, då får tåka lov å etablere seg i terrenget om natta, fortel meteorologen.

Med stille og klårt vêr kan det fort bli kaldt om nettene, og lokalt kan det fort bli nattefrost.

Høgtrykket sender lågtrykka nordover

Statsmeteorolog Per Egil Haga har kikka på vêrprognosane for veka framover. Han kan melde at vêret ser ut til å halde same stil ut i neste veke.

– Høgtrykket som ligg over Sør-Noreg styrer lågtrykka nordover, forklarar meteorologen.

Difor kan dei vente seg både nedbør og kuling, og kanskje brygger det opp til storm mot slutten av veka i nord. Frontane vil også merkast i Trøndelag og Møre og Romsdal, med regnbyer og litt grått vêr.

– Mot helga kan det også bli regnbyer sør for Stad når lågtrykka trekk nedover, og kanskje blir det innslag av snø i høgtliggande strok, avsluttar meteorologen.