«Hugsar du det året vi vassa i snø til magen?»
No kan du avslutte diskusjonen om julevêret rundt middagsbordet med harde fakta frå Meteorologisk institutt. Var det eigentleg snø til magen?
Her kjem oversikta over kor mykje snø Bergen faktisk hadde julaftan 2010, og kva år Tromsø faktisk ikkje hadde snø på bakken.
Snødekket blir klassifisert i kodar. Når talet er 3 eller 4, reknar meteorologane at bakken er heilt dekka av snø.
Der rutene i statistikken er tomme, manglar det data for denne vêrstasjonen.
Tromsø
Tromsøværingar bruker å kunne vere ganske sikre på at bakken er kvit den 24. desember. Mellom 2000 og 2013 har tolv julaftnar blitt feira med snø på bakken.
Det største snømengda dei har hatt dei siste 15 åra var i 2003. Då var bakken dekka av 70 centimeter djup snø.
Trondheim
Også trønderane har vore vande med å ha snø på bakken når sølvgutane sine vene tonar strøymer frå TV-apparat og radioar. I Trondheim har det vore 10 juler med snø dei siste 15 åra.
Julaftan i 2010 var den mest snørike. Då låg det 43 centimeter snø på bakken i Trøndelag.
Vêrdataa er henta frå flyplassen Værnes.
Oslo
I hovudstaden ligg det an til ei jul med temperatur rundt 6–7 plussgrader i år. Kanskje blir det som julaftan i 2013? Då var det 6 plussgrader i døgnmiddeltemperatur.
Dei siste 15 åra har også Oslo hatt 10 julaftnar der gradestokken har vist minusgrader.
Den kjøligaste, i 2010, var det minus 11,5 i døgnmiddeltemperatur. Brr!
Bergen
Bergensarar er ikkje bortskjemde med kvit jul. Tre av 15 år har det vore heildekkande kvitt dekke på bakken, og årets jul ligg ikkje an til å føre meir snø inn i statistikken. Den ser i grunn ut til å bli ganske våt, med varsel om rundt 17 millimeter 24. desember.
Det er framleis mindre enn det regna i 2003, då det fall 35,6 millimeter nedbør i løpet av denne desemberdagen. Kanskje er det julaftan nedbørsrekorden for Bergen skal bli slått i støvlane?
Kristiansand
På den kystnære flyplassen Kjevik ved Kristiansand er dei vande med mild jul. Sidan 2000 har dei hatt plussgrader 9 av 15 julaftanar. Det varmaste året var 2013 – då var døgnmiddeltemperaturen 8 grader.
Men det har også vore kvitt på bakken i sørlandsbyen. I 2001 var snødekket 4 på skalaen, og det betyr at heile bakken var dekka av det kvite. Snødjupna var 3 cm denne julaftan. Hugsar du om det var nok til å ake?
Her kan du sjå snødekket på julaftan frå 1994-2013:
