Er El Niño-turisme delstaten California sitt neste trekkplaster? Fleire skisenter i California har hatt den tidlegaste opninga på årevis grunna store snøfall i starten av november, skriv amerikanske Accuweather.
«El Niño is coming! Get your skipass now», reklamerer eit skisenter på si nettside.
Forventningane er høge til El Niño si evne til å bringe snø til fjellkjeda Sierra Nevada i det tørkeramma California, men vêrfenomenet er først og fremst kjend for å gi svært farleg vêr i form av både tørke og flaum.
No melder World Meteorological Organisation at dei ventar at El Niño blir styrka fram mot slutten av året.
Kan bli blant dei sterkaste El Niño-tilfella sidan 1950
I oktober vippa temperaturen aust i Stillehavet mellom 1,9 og 2,5 grader over normalen.
El Niño toppar seg vanlegvis rundt juletider, og då ventar forskarane at den vil gå inn i det tvilsame selskapet med dei tre sterkaste tilfella sidan 1950 (i 1972-73, 1982–83 og 1997-98).
Ekspertane har lært mykje om vêrfenomenet dei siste åra. Men ei ny utfordring er korleis El Niño vil fungere i ei verd med stadig varmare hav, mindre arktisk sjøis og mindre snødekke om sommaren.
– Denne naturlege El Niño-hendinga og menneskeskapte klimaendringar kan påverke kvarandre på måtar vi aldri før har opplevd, skriv WMO.
Forskarane peikar på at overflatetemperaturane på kloden var uvanleg høge allereie før El Niño var i gang. El Niño skrur opp varmen ytterlegare.
Årets El Niño har allereie vist krefter. Det har vore rekordmange tropiske orkanar i stillehavsbassenget, og det varme havvatnet har ført til omgripande bleiking av korallrev, melder NOAA,
Forskarane meiner også at El Niño har vore med å påverke under tørka som har gitt grobotn for omfattande skogbrannar i Indonesia i haust.
El Niño er kjenneteikna ved temperaturar høgare enn normalen i Stillehavet. Den er venta å toppe seg rundt juletider, og gå over mot nøytral situasjon etter første kvartal av det nye året.
Foto: NOAAPressar på jetstraumen
Før sommaren antyda forskarane at El Niño kunne sløkke tørsten i California. El Niño er kjend for å snu opp ned på vindar og havstraumar, og kan gi ekstra vått vêr i Sør-Amerika og tørke i Søraust-Asia.
I tillegg kan El Niño presse jetstraumen nedover slik at den slynger seg lenger sør. Då har den gjerne med seg nedbør til California, skriv universitetet i Berkeley.
I California kryssar dei fingrane for at vinteren skal bli like våt som i El Niño-året 1997–98. Den omfattande tørka har også gitt fire elendige skisesongar i Sierra Nevada, men no har El Niño tent håpet for ein snørik vinter hos ski- og brettløyrarar i California.
Det siste snøfallet kan jo tyde på at det kan gå i den retninga. Kanskje stiller «gutebarnet» med ei ekstra kvit jul i år?
- Les også:
