Ingen strålande sommarvarme i sikte

Det ustyrlege sommarregnet held fram, i rykk og napp. Vi får både regnbyer og solglimt, for den varme lufta gøymer seg bak jetstraumen i sør.

Bikini og paraply

Denne veka ligg an til å halde fram med same type vêr som dei føregåande, fortel statsmeteorolog Justyna Wodziczko frå kontoret sitt i Tromsø.

– Det blir nok ingen temperaturendringar i Sør-Noreg med det første. Det er ingen varmluft på veg inn enda, fortel Wodziczko.

Det er ingen grunn til å la paraplyen bli igjen heime for dei som bur sør for polarsirkelen. Vêret er prega av regn og regnbyer, og vinden kjem inn frå havet frå nord og nordvest.

Men bildet er ikkje aldeles grått, så ikkje fortvil! Det blir også periodar med sol mellom regnbyene, og spesielt kan torsdag sjå lettare ut i sør.

Men vêrtypen vi har no, er det typisk at vi får regn og torebyer som ikkje er meldt av modellane på Yr. Då er trikset dette:

• Sjekk det nye nåvarselet på Yr sine mobilsider
• Har meteorologane på Twitter meldt om noko nytt?
• Les tekstvarselet

  

Kortvarig oppvarming i nord

Tysdag kjem sommaren til nord – for ei lita stund. Kortvarig varmluft kjem inn over Nordland, Troms og Finnmark, og kan gi ein fin sommardag med temperaturar opp mot tjue grader.

To faktorar kan lage skår i sommargleda:

– Det kan bli tjue grader og sol dersom ikkje havtåka kjem inn over kysten. Då vil den ligge over kyststroka først på dagen. Typisk nok så utviklar det seg også nokre ettermiddagsbyer i Nordland og på Vidda, fortel meteorologen.

Varmlufta blir fort erstatta med lågtrykk, og tysdag kveld kjem det kaldare og fuktig luft inn frå aust. Det betyr skyer og meir regn i nord.

– Generelt sett ser veka lik ut i landet, mykje pålandsvind og lokale byer. Særleg på kysten kan det komme noko tåke og pålandsvind.

Jetstraumen har parkert sør for oss

Skiljet mellom den kalde og fuktige polarlufta og den varmare lufta i sør går ofte ved jetstruamen. Den bølgar seg rundt kloden langt over hovuda våre.

Dei siste vekene har den parkert seg under Noreg. Då hamnar det fine og varme vêret sør for oss og kjem seg ikkje forbi jetstraumen.

På den andre sida ligg vi, og får berre dei små lågtrykka og det ustabile vêret å kose oss med.

Men statsmeteorologen i Tromsø augnar eit ørlite håp for betring:

– Det kan sjå ut som at det bygger seg opp eit lite høgtrykk frå tysdag eller onsdag neste veke. Det er stor uvisse sidan det er så langt fram i tid, men det er ein moglegheit!