Laurdag og natt til søndag er det venta ekstreme nedbørsmengder i Rogaland og Agder. Det kan kome 100–150 millimeter nedbør på 30 timar, og lokalt i indre strok kan det kome opp i 150–200 millimeter.
Meteorologane har sendt ut fase B-varsel for ekstremvêret «Synne».
– Det er like mykje nedbør som ein kan vente seg kvart 25–50. år. Det er ein veldig spesiell situasjon, fortel statsmeteorolog Geir Ottar Fagerlid ved vêrvarslinga på Vestlandet.
Den kraftige nedbøren startar rundt midnatt fredag, og er venta å halde fram til søndag. Verst blir det i indre strok av Agder og Rogaland.
- NVE har sendt ut oransje varsel, faregrad tre for flaumfare for Hordaland, Rogaland og Agder. Les varselet på Varsom.no.
- NVE varslar også om stor snøskredfare i Hordaland, Sogn og Fjordane, Rogaland og Vest-Agder.
Dei same områda låg på grensa til ekstremvarsel i dag tidleg, og i natt og utover helga er det venta enda meir nedbør:
Full storm langs kysten
Medan indre strok får mest nedbør, får ytre strok og kysten oppleve sterk vind. I Rogaland og Agder er det venta full storm laurdag og natt til søndag, melder meteorologen.
– Dei stadane som får lite nedbør får til gjengjeld mykje vind. Det blir skikkeleg ruskevêr, konstaterer Fagerlid.
Også i fjellet kan det bli full storm, altså vedvarande vind på 25 meter i sekundet.
Lufta som kjem inn med nedbøren er veldig mild. I låglandet er det venta temperaturar på 7–10 grader, og snøgrensa vil ligge heilt oppe på 1400 meter.
Lågtrykk frå Island
Lågtrykket er no i utvikling sør for Island. Det vil flytte seg sakte austover, og sveipe over Storbritannia på vegen. Også der er det sendt ut varsel for mykje uvêr. Lågtrykket vil komme med mykje varm og fuktig luft, som gir mykje nedbør når det treff Sør-Noreg frå sørvest.
– Fjella gir ein geografisk forsterking, dei gjer at vi får ekstra mykje nedbør, seier meteorologen.
Det vil også bli sendt ut OBS-varsel for mykje nedbør i Sogn og Fjordane og Hordaland laurdag. Men der vil ikkje verdiane blir så høge at det er vurdert ekstremt, forklarar Fagerlid.
– Det er svært kraftig pålandsvind, så det vil bli merka best i midtre og indre strok.
Den varme og fuktige lufta vil bli dirigert inn i dei råka områda fram til søndag. Då er det venta å gå over til byevêr, og kaldare luft kjem inn.
Hald deg opp datert på nyheitene, og følg med på flaumvarsla på Varsom.no, er meteorologane si oppmoding.