Det har ikkje skorta på varme sommardagar i år, men fredag kan verte den aller varmaste.
– Det vert tørt i heile Fastlands-Noreg på fredag. Heile landet får varmt vêr og alle fylke i Sør-Noreg kan få over 30 grader, seier statsmeteorolog Eldbjørg Moxnes.
– Fleire stadar vil nok få 34 grader!
Her er ei oversikt over alle dei noverande fylkesrekordane i Sør-Noreg. Desse vert utfordra i morgon.
Ei siste rekordjakt
Denne sommaren har vi allereie registrert eit hopetal nye rekordar. Førebels var årets varmaste dag 26 juni, då Nedre Eggedal i Sigdal kommune kunne måle heile 33,8 grader. No ser det ut som denne rekorden ryk.
– Det er ganske sannsynleg at årsrekorden frå Nedre Eggedal vert slått, seier Moxnes.
Samstundes er ho meir tilbakehalden på kor vidt vi klarer å gå forbi den absolutte varmerekorden her til lands. Den 48 år gamle rekorden frå Nesbyen. Laurdag 20. juni 1970 gav ikkje sola fred før gradestokken viste 35,6 grader.
– Det er nok under 50 % sjanse for at vi slår den, men samstundes vert eg ikkje overraska om vi går forbi, seier Moxnes.
Men då må alt klaffe. Himmelen må vere skyfri, sola må steike, og vinden må hjelpe til.
REKORDFREDAG: I morgon kan rekordar ryke, seier statsmeteorolog Eldbjørg Moxnes.
Foto: PrivatKor vert det varmast?
I mai duellerte Bergen og Oslo om å vere varmast, medan Etne i Hordaland knuste dei begge. Samstundes byter ulike stadar i Buskerud på varmerekordane, og Nord-Noreg loggfører den nest varmaste tropenatta i landet nokon sinne.
Det vert difor spennande å sjå både kor høgt temperaturen stig, og kor i landet det er.
– Det er vanskeleg å vete kor det vert varmast på forskot. Det er veldig mange varme luftmassar i heile Sør-Noreg, seier statsmeteorologen.
Moxnes legg til at indre strøk på Austlandet ikkje er eit dårleg alternativ. Nedre Eggedal kan igjen gå sigrande ut av rekordjakta eller Gulsvik kan atter ein gong bevise at det er den varmaste staden i Noreg. Men det kan også verte ein heilt annan plass, som indre strøk i Møre og Romsdal.
– I områda nord for Stad kan det komme ein frålandsvind som kan fungere som ein fønvind, og med litt hjelp frå denne kan det verte temperaturar godt over 30 grader, seier statsmeteorologen.
