Oslo kan verte varmaste hovudstad i Europa

På tysdag var det årets varmaste dag mange stadar Austafjells. Rekorden frå Drammen og Vestfossen flytte litt lenger nord i Buskerud til Sigdal kommune. I Nedre Eggedal var det 33,8 grader.

Så varmt har det ikkje vore sidan den historisk varme sommaren i 2014.

Varmaste hovudstaden i Europa

I dag kan det fort verte endå varmare. Oslo ligg an til å verte den varmaste hovudstaden i Europa.

– Hadde nokon spurt meg for tre veker sidan om kva som vert den varmaste hovudstaden i slutten av juni, så hadde eg sett pengane på eit av middelhavslanda, seier statsmeteorolog Kristian Gislefoss.

Høgtrykket som ligg over Austlandet gjer at vi tek imot mykje varme frå sør. Det har ført til dagens rekordjakt.

– Det kan verte Madrid, men Oslo kan fort stikke av med den høgaste temperaturen. For Oslo sin del, så vil det komme inn nordvestleg vind, og då slepp vi å få inn den kjøligare havlufta. Men vi får ikkje svar før seinare i dag, i 17-18-tida, for då når hovudstaden makstemperatur, seier statsmeteorologen.

Endå ein ny rekord?

– Torsdag vert det mange plassar som har over 30 grader, seier statsmeteorolog Kristian Gislefoss, og legg til at temperaturen fort kan ende over 34 grader.

Så høg har temperaturen vore berre tre gongar sidan 1990. 6. juli 1991 kunne dei i Nesbyen måle 34,6 grader. 3. juli 2009 stoppa ikkje gradestokken i Gulsvik før den viste 34,2 grader. Og 23. juli 2014, rekordsommaren, kunne Gulsvik igjen registrere 34,5 grader.

Kvifor er det så varmt i innlandet?

Felles for desse rekordmålingane er at dei er frå Buskerud. Etne i Hordaland stal ein varmerekord frå Sigdal i mai, men årets varmaste dag var det ikkje.

– Grunnen til at det er så varmt i indre strøk er topografien. Sjølufta frå kysten når ikkje inn, der er mange dalar og stilleståande luft. Det får litt gryteeffekt. Nede i gryta vert det varmt, seier statsmeteorologen.

– Vi kan jo snu på det også, det er vêrstasjonane ved sjøen som måler flest tropenetter! Sjøen held mykje betre på temperaturen enn landjorda gjer. Om det er 20 grader i sjøen om dagen, så er det også det om natta.

Vêrkontrastane vert mindre

Tropedagar varer ikkje evig. Dagen i dag må nyttast og nytast, for allereie i morgon kjem det kald luft frå nord.

– Fredag vil temperaturen enkelte plassar fort kunne falle nesten ti grader, til nokre av 20 grader. Det som skjer er at vi får inn ein vind frå nordleg retning, seier statsmeteorolog Gislefoss, og legg til at gjennom helga vil temperaturen sakte, men sikkert stige att og ligge rundt 25 grader.

Til helga vert også dei enorme vêrkontrastane frå sør til nord mindre.

– I Trøndelag vert det nedbør torsdag og fredag, men så ser det betre ut utover helga, og temperaturen vil stige også her, seier statsmeteorologen.

Gladmeldinga strekk seg også heilt nord, der juni har vore prega av andre rekordar. Mykje nedbør og få soltimar.

– I dag passerte Tromsø den gamle nedbørsrekorden, men juni er endå ikkje over, så nedbørsmengda vil framleis stige.

Men både for Nordland, Troms og Finnmark er også betre vêrdagar i sikte.

– I Nord-Norge er det dessverre ein grå vêrtype fram til og med laurdag. Søndag ser det ut som vi får ei vêrendring. Det vert mykje meir sol og stigande temperaturar, og utover neste veke er vi rimeleg sikre på at ein del stadar i Nord-Norge også vil sjå 20-talet på gradestokken, seier statsmeteorolog Gislefoss.