Meteorologisk institutt og NRK samarbeider om vêrtenesta yr.no, med varsel for sju millionar stader i Noreg og resten av verda.
Dei nye sidene er ikkje ferdige, men testversjonen vart lagt ut i slutten av mai for å teste sidene og få tilbakemeldingar frå publikum.
– Vi har fått svært positive reaksjonar på sidene, fortel informasjonsdirektør Heidi Lippestad i Meteorologisk institutt. Det ser ut til at publikum er svært nøgde med kor detaljerte sidene er, og vi har fått mykje skryt for nøyaktige og gode varsel.
Fleire brukarar enn venta
Redaksjonen bak yr.no såg ikkje for seg at sidene skulle bli populære så raskt, og underdimensjonerte servarkapasiteten kraftig. Det har gjort at enkelte element på sidene (mellom anna dei populære animerte karta) er blitt mellombels fjerna, og at sidene går svært sakte til tider.
– Vi arbeider på spreng med å få opp farten på sidene, seier Erik Bolstad, redaktør for yr.no. Etter at vi får retta dei viktigaste tekniske feila, vil vi arbeide vidare med nye og spanande tenester.
Redaksjonen arbeider mellom anna med å lage detaljert klimastatistikk for alle kommunane i landet. På desse sidene skal du få svar på spørsmål som «Kva er den varmaste sumaren i Tromsø nokon sinne?» og «Har det blitt varmare eller kaldare i Oslo dei siste 100 åra?».
– Send oss gjerne ei melding om det er andre tilbod og tenester du ynskjer deg frå oss, oppfordrar Erik Bolstad.