Normal

Varslar hetebølgje i Spania

Denne veka kan temperaturane kome opp i 43 grader i Spania. Også andre område rundt Middelhavet kan vente seg svært varme dagar.

Hetebølge i Spania

VARMT: Delar av Spania kan få temperaturar opp mot 43 grader denne veka. I Madrid er det 13 grader varmare enn normaltemperaturen i juli.

Foto: yr.no

– Det vert ganske heitt i Spania dagane framover, konstatera statsmeteorolog Eldbjørg Moxnes.

Medan fleire stadar i Noreg slit med ustabilt og til tider kaldt sommarvêr, er situasjonen ein annan i Europa.

– Hetebølgja vil spesielt råke indre søraustlege delar av Spania. Der vil temperaturen midt på dagen onsdag og torsdag kome opp i 43 grader.

Det er mange grader forbi normaltemperaturen i Spania i juli:

– I Madrid er til dømes normal makstemperatur i juli 32,0 grader og i Granada er normaltemperaturen 34,8, fortel Moxnes.

Hetebølgja ser ut til å vare til helga. Då vil varmen minke og temperaturane vert i underkant av 40 grader, melder meteorologen.

I Dagbladet, som viser til danske TV2, skriv dei at hetebølgja i Spania kan gje temperaturar opp mot 47 grader. Eldbjørg Moxnes ved Meteorologisk institutt seier at 47 grader er i overkant av det prognosane til instituttet viser.

– Men det vert likevel meir enn varmt nok, kommenterer ho.

Varmt i områda rundt Middelhavet

Fleire i Europa kan vente seg brennheite tilstandar denne veka.

– Det kan bli opp mot 40 grader også andre stadar i Spania. I tillegg er andre område rundt Middelhavet varme og over normalen. Lite skyer gjer at sola varmar ekstra godt, fortel Moxnes.

Lite skyer, saman med varmen som kjem med vinden frå sørlege breiddegrader (Afrika), er bakgrunnen for desse høge temperaturane, forklarar ho.

Sjå korleis temperaturane utfoldar seg i yr sitt vêrkart.