For Meteorologisk institutt har sendt ut farevarsel for snøfokk og nedbør i ei salig blanding av regn og snø langt til fjells.
– Folk må vere budde på kolonnekøyring og stengde vegar, seier operatør i Statens vegvesen, Tina Fjeldavli, til NRK.
Utover ettermiddagen og kvelden måndag går det frå mildt til kjøligare vêr. Det fører med seg ein stiv kuling og snø frå om lag 900 meter og oppover.
Denne vêrtypen gjer at det fort blir kraftig snøfokk på utsette fjellovergangar i heile Sør-Noreg.
Fare for flaum
Men så kjem morgondagen. Då vil det kome inn kraftige regnbyer i vest, ikkje minst i midtre deler av Hordaland.
60 til 80 millimeter regn og auka temperaturar tysdag, gjer at meteorologane har sendt ut eige farevarsel for flaum.
– Det er venta så mykje nedbør at det kan bli overvatn i tettbygde område og på vegane kan det bli fare for vassplaning, seier statsmeteorolog Haldis Berge.
Regn langt til fjells
I fjellområda i Sør-Noreg tysdag morgon og føremiddag vil temperaturauken føre til at det blir regn opp til 1400 meter over havet.
– Det kan bli vanskelege køyreforhold med vatn i vegbana og det kan kome ned stein og jordras. Folk bør vere obs på det når dei er ute og køyrer, seier Fjeldavli i Vegvesenet.
Entreprenørane er ute og sørger for at kummar og stikkrenner er reine og klare til å ta unna nedbørsmengdene.
