Slik vert vêret i fellesferien!

På måndag startar fellesferien, og sommaren tek til for fullt. Vert det late dagar på stranda? Eller kjem feriedagane til å regne vekk?

Om dei siste to månadane er ein indikasjon på korleis vêret vert framover, så bør vi alle pakke badebuksa og reise til Buskerud.

Kven får det beste ferievêret?

Fellesferien er strategisk plassert, historisk er nemleg vêret best frå veke 28–29 og utover. Men med den hetebølgja landet hadde i mai, er ikkje det nødvendigvis tilfelle i år.

– Det er ikkje godt nytt til dei som vil ha regn på Austlandet, og heller ikkje til dei som vil ha sol og varme på kysten heilt frå Vestlandet til Finnmark, seier statsmeteorolog Magnus Ovhed.

Spitsbergen og Nord-Noreg

Nord i vårt langstrakte land ser det ut som kvoten på godvêr vart brukt opp i vinter, med nesten halvannan månad med tørt og fint vêr.

– Det vert veldig mykje vestavêr. Vest for Nordkapp, særleg på kysten, så vert det ganske så kjølig. Rundt 10 grader, kanskje opp til 15 grader om ein er heldig. Aust-Finnmark og Finnmarksvidda ser ut til å få det beste vêret. Der vert det minst nedbør, høgare temperaturar og sol, så der kan ein nå opp i 20 grader i periodar, seier statsmeteorologen.

Det kjem derimot til å verte relativt tørt, så ingen ny nedbørsrekord i sikte.

– Framover ligg det an til mykje pålandsvind, og tidvis litt regn, men ikkje store mengder.

Pålandsvinden gjev seg også til kjenne på Spitsbergen, der den vil komme frå sørvest, og samstundes vil det verte ein god del skya vêr.

Midt-Noreg og Vestlandet

For heile kyststrekninga frå Vestlandet og nord til Finnmark går mykje av det same mønsteret att, men med nokre lokale forskjellar i indre og ytre strok. Den vestlege luftstraumen og den kjølige havlufta blæs sommaren vekk.

– Det vert ganske kjølig, kanskje nokre grader meir enn i nord, men heller ikkje mykje over 15 grader. Ein kan få periodar der vinden snur ein dag eller to, og då klatrar temperaturen ganske raskt opp, men det er ikkje venta skikkeleg høgsommarvêr akkurat, seier Ovhed.

Og dei store nedbørsmengdene mange i sør lengtar etter held seg unna.

– Det ser ut som det vert relativt lite nedbør, og at det kan verte ein smule tørrare enn normalt!

Sørlandet og Austlandet

– Om ein er ute etter sol og varme, så er Austlandet framleis staden å vere!

I mai var vêret i sør så flott at det nærmast kokte i sjøen – så varmt hadde vatnet knapt vore på hundre år. Nokre plassar var det også i juni varmare i vatnet enn på land. Og sydentilstanden skal halde fram, med unntak av nokre små byer på måndag.

– Både på Sørlandet og Austlandet ligg det an til at det vert lite eller ingen nedbør, og varmare enn normalt for månaden. På Austlandet ganske mykje over det normale, seier statsmeteorolog Magnus Ovhed.

Det er difor viktig å vere ekstra merksam på den høge skogbrannfaren, og framleis vere medviten om vassforbruket.

– Om det held fram som no, så kan ein ikkje utelukke nye varmerekordar, men det skal jo litt til.