Slik blir vêret under Birkebeinerrennet

Denne helga blir Birkebeinerrennet arrangert for 77. gang.

OPPDATERT: Birkebeinerrennet 2014 er avlyst

Deltakarane på Fredagsbirken fekk i dag starte turen sin under ganske gode forhold. Men i morgon når sjølve Birkebeinerrennet går av stabelen, blir det litt meir trøblete startforhold.

– Det største problemet for skiløparane i år blir laurdagen, fortel Ingrid Berntsen ved Meteorologisk institutt.

Fyrste klasse legg ut frå Rena laurdag morgon klokka 07.30. Løparane får opphaldsvêr, men litt ekstra motbør i løypene dette året.

– Startar løparane tidleg får dei motvind. Ein nordvestleg vind kan gjere det litt tyngre å komme i gong, seier Berntsen.

Løparane må gå i motvind særleg fyrste del av laurdagen. Utover dagen, kring lunsjtider har dette roa seg. Då får dei skiglade løparane mindre vind og mindre skyer.

SJÅ OGSÅ: Yr si detaljerte oversikt over Birkenvêret

Austlandet: Sats på laurdag

Skal du ikkje gå Birken, men heller nyte helga i låglandet, får du stort sett fint vêr å gjere det i. Men legg gjerne turen til laurdag, for då blir det best vêr.

– Laurdag blir det stort sett fint vêr på Austlandet og i Telemark. Det kan komme nokre spreidde byer om ettermiddagen, men stort held det seg fint, seier meteorolog Ingrid Berntsen.

Skyene vil krype over Austlandet på søndagsformiddag. Utpå ettermiddagen vil det byrje å regne. Denne nedbøren kjem som snø i høgda, samt nord på Austlandet.

UT PÅ TUR: Sjekk snødybder her

Sørlandet: Bra vêr på deler av Sørlandet

– På Sørlandet startar laurdag med ein del sol, fortel Berntsen.

Har du tenkt å ta deg ein helgetur, kan det difor vere lurt å komme seg ut tidleg. I totida vil det nemleg komme nedbør i vest.

Er det ei vandring langs Sørlandskysten som står på planen, bør du halde fast i hatten. Her vil det blåse opp i sterk kuling. Vinden vil minke utover dagen.

Nedbøren som startar søndagsettermiddag held fram med auka intensitet utover søndag. I Agder vil det regne av og til, men ein vil også få periodar med sol.

Vestlandet: Bygevêr

Laurdag blir det bygevêr på heile Vestlandet og i Trøndelag.

– Det blir ikkje noko særleg helgevær på Vestlandet, seier meteorolog Ingrid Berntsen.

Jo lenger nord du oppheld deg, jo meir snø skal du få. Meteorologane melder regnbyer på kysten i sør, og snøbyer lenger nord. Møre og Romsdal og Trøndelag vil høyre til sistnemte gruppe og få snø denne helga, samt periodar med kuling.

LES OGSÅ: Se forskjellene i søkkvåte Norge

Nedbøren vil halde fram på søndag. Dette gjer at Vestlandet og Trøndelag går av med sigeren i vekas dårlegaste helgevær i Sør–Noreg. Men klage kan ein ikkje i sør, for vender ein blikket mot nord, kan ein verkeleg få sjå på vêr.

Troms og Nordland: Det går mot slutten for Kyrre

Snøen held fram med å lave ned i nord i dag. På søndag skal uvêret vere over i Midt– og Nord–Noreg, men meteorologane er framleis uroa for folk som ferdast i dette området.

– Folk må vere veldig forsiktige når finvêret kjem. Det blir stor skredfare, åtvarar statsmeteorolog Matilda Hallerstig.

Meir om dette kan du lese her: Nå raser Kyrre fra seg – yr.no