Eit melisdryss med snø har snike seg ned i låglandet i Sør-Noreg denne helga. Den kom visst overraskande på, for politiet venta trafikkaos måndag morgon.
Nyttårsveka er temperaturen på veg opp igjen, og «vind» er stikkordet over heile landet.
Full storm i fjellet og på kysten
Nyttårsveka halde fram i same, vindfulle spor som julehelga på Vestlandet og i Trøndelag.
Denne gongen er det Rogaland som får den hardaste trøkken. Måndagskvelden vil det blåse liten storm i Rogaland.
– Utover natta brer det seg til utsette plassar over heile fjøla, fortel statsmeteorolog Haldis Berge som melder vêret for Trøndelag og Vestlandet.
Frå tysdag er det venta full storm i fjellet i Sør-Noreg, spesielt i områda mot vest. Vinden er venta å vere sterkast i Rogaland først, og i løpet av onsdag vil Hordaland og Sogn og Fjordane få full storm.
Grunnen til den sterke vinden er eit høgtrykk som ligg over Finland og eit frontsystem som pressar på frå vest.
Foto: Yr.noDet er først nyttårsaftan, torsdag, at nedbøren verkeleg bryt igjennom høgtrykksbarrieren.
– Nedbøren vil starte samanhengande om morgonen, og gå over til byekarakter om kvelden, melder meteorologen om nyttårsaftan.
Trøndelag kan sleppe unna nedbøren, men også dei vil merke at temperaturane er på veg opp.
– Onsdag kan det bli opp mot 7–8 plussgrader i låglandet, fortel Berge.
Opphald i nord
I nord nyt Rafael Grote og dei andre meteorologane ved vêrvarslinga i Tromsø godt av ein høgtrykk som sakte vandrar austover frå Nordland.
Også her er det sterk vind frå sør og søraust. Elles er opphaldsvêr stikkordet i nord, og det vil halde seg i same stil heile veka.
– Det blir ikkje klarvêr, men skyene er ikkje særlig tette. Det vil vêre høge skyer, og ein vil kunne sjå fyrverkeriet greitt, seier Grote om nyttårsaftan i Nordland, Troms og Finnmark.
Lett snødryss, men ikkje skiføre
Eldbjørg Moxnes ved Meteorologisk institutt i Oslo er ein av dei som ventar på skiføre i låglandet Austafjells.
– Det vil bli eit lett snødryss i alle områda Austanfjells, utanom kanskje lengst nord. Men det blir ikkje nok til skiføre i lågare strøk, vi skulle gjerne hatt litt meir!
Også Austanfjells merkast vinden frå sør og søraust, men mest langs kysten i Agder og i fjella. Moxnes fortel at det er spaning knytt til kva som skjer nyttårsaftan:
– Det blir mildare onsdag og torsdag. Det er noko nedbør som skal passere i overgangen mellom torsdag og fredag, så det er spennande om det treff før eller etter fyrverkeri!
Dersom nedbøren treff midt i nyttårsfeiringa kan det bli lågt skydekke, grått og nedbør Austanfjells. Men dryger det litt, blir det stort sett greitt, fortel meteorologen.
