– Dei som ligg best an til å få finvêr i haustferien er dei som held seg i låglandet austanfjells, seier statsmeteorolog Kristen Gislefoss, medan han ser på prognosane for dei komande dagane og veke 40.
Dét skulle passe veldig bra, i og med at det er haustferie frå skulen i dei mest folkerike områda på Austlandet neste veke. Alle austlandsfylka utanom Hedmark og Telemark tek haustferie 1.–5. oktober. (Sjå faktaboks under)
Fint haustvêr i aust
– Det er ein del som meiner at vi kunne fått betre haustferievêr enn dette, men ser du til dømes på Oslo, så blir det ikkje gale, fortel Gislefoss.
Med det meiner han svært lite eller ingen nedbør og temperaturar rundt det som er normalt for årstida (ca. seks grader i Oslo).
Han teiknar ein strek frå Agder gjennom Telemark, Buskerud, Oppland, og Hedmark, og seier at i desse områda og lenger aust blir det i store delar av neste veke fint vêr.
– Og så ser det ut til at det kan bli litt våtare i slutten av haustferien. Altså neste helg. Det er gjengangaren i varselet for heile Noreg, seier han.
På denne animasjonen kan du sjå korleis temperaturane blir i Sør-Noreg heile haustferieveka:
– På med vinterdekk!
LANGFJELLA: Slik meteorologane definerer området.
Foto: Meteorologisk institutt/Anders SivleDet er altså aust for dei såkalla Langfjella (Sjå bildet) ein er sikra det beste haustferievêret. Lenger opp mot høgfjellet er han trygg på at det kjem meir nedbør.
– Der er ein litt meir påverka av vestleg og nordvestleg vind. Dermed blir det litt meir skya med bygevêr der, seier han.
Desse bygene kan også komma som snø.
VIDDA I DAG: Sko bilen etter kvar du skal i haustferien. På Nordvestlandet og i Trøndelag er det fare for vanskelege køyreforhold.
Foto: NRK-TIPSAR– Ja, og ganske langt ned i terrenget. Skal du til fjells vil eg anbefala vinterdekk på bilen. Det er ikkje sikkert snøen blir liggjande på vegen så lenge, men det er betre å vera føre var, meiner meteorologen.
Og har du tenkt deg med bil over ein av fjellovergangane i Sør-Noreg i helga, blir du råda til å komma det over i dag, fredag.
LES OGSÅ:
Austlandet er beskytta av fjella
Slik vêret oppfører seg for tida, med kø av lågtrykk som treff Vestlandet, ligg Austlandet beskytta mot nedbør.
Det kan du sjå på denne prognosen for helga:
På bildet ser vi at Finnmark, som også har haustferie førstkommande veke, får ein fin start. Men Kristen Gislefoss kan ikkje love at finvêret held fram heile ferien lengst nord.
– I Finnmark blir det einskilde netter med frost, men elles vil temperaturen liggje på tre-fire grader med litt søraustleg vind, forklarar han.
– Akkurat no ser det ut til at det kan bli litt nedbør i indre delar av fylket neste veke, mens kysten kan gå klar for regn. Mot slutten av veka ser det ut til at også indre delar av Finnmark er utsett for nedbør, seier Gislefoss.
På animasjonen under kan du sjå korleis temperaturane i Finnmark går mot det kaldare i haustferien:
