– Det er vanskeleg å peike ut ein vêrvinnar for påske, seier vakthavande meteorolog Eldbjørg Moxnes.
Skiftande vêr dei fleste stader er eit stikkord.
– Det startar forholdsvis mildt i heile landet og det held seg utover neste veke. Frå skjærtorsdag ser det ut som det blir kaldare luft i heile landet. Påskehelga blir nok kaldare enn palmehelga, fortel meteorologen.
– Før den tid er det variert vêrtype dei fleste stader, legg ho til.
Lurt å pakke for ulikt vêr
Prognosane for sjølve påskehelga er framleis litt usikre, men tipset frå meteorologen er at dette blir ei påske der folk bør sjekke vervarselet relativt ofte.
– Ein bør kanskje pakke for variert vêr, og ikkje langtidspakke for heile påska. Sjekk vêrmeldinga frå dag til dag.
– Er det stader der det blir gløtt av strålande påskevêr?
– Det trur eg nok. I Nord-Noreg vil det kome nysnø, med solgløtt vil det bli påskestemning. På Vestlandet kan det også bli fleire dagar med sol, i fjellområda over 500-600 meter er det framleis mykje snø. Der kan det bli påskestemning, seier Moxnes.
Frå i morgon kan det bli periodar med kuling langs kysten og på fjellet, noko som kan vere lurt å ta omsyn til om ein skal ut på vegane.
– Det blir ein del vind i fjellet i Sør-Noreg i morgon. For dei som har tenkt å reise på fjellet i morgon kan det vere greitt å vente til laurdag. Det kan bli litt ruskete på fjellovergangane i morgon kveld.
Kaldare i påskehelga
Meteorologen gir nokre stikkord for påskeveka:
- Nord-Noreg: Mesteparten av nedbøren vil kome som snø, med unntak av kysten av Nordland. Periodar med nedbør, men det blir også dagar med opphaldsvêr og ganske rolege vindforhold
- Midt-Noreg: Periodar med nedbør, det ser ut det begynner allereie palmelaurdag. Blir også periodar med sol, då kan temperaturane stige til 6-8 grader fram til midten av neste veke.
- Vestlandet: Periodar med nedbør. Vestlandet sør for Stad får truleg mest nedbør. Her blir det truleg blir flest dagar med nedbør og færrast med opphald. Snøgrense på 500-700 meter utover neste veke. Påskehelga er usikker, men det kan bli nordavind og ein del sol. Blir kaldare frå torsdag.
- Austlandet: Startar grått. Kjem nedbør som regn fredag, fortset utover laurdag. Det blir skiftande vêr søndag-måndag, finast tysdag-onsdag. Då blir det opp i ti-tolv grader. Periodar med sol. Det kjem kaldare luft frå torsdag. Det er mogleg det kjem nedbør, men ikkje som snø i lågareliggande strøk. Usikkert i påskehelga, kan bli ein del sol.
