– Eksepsjonelt mildt

Rekdal i Møre og Romsdal har vore oppe i 18,1 grader i dag. Også helga byr på unormalt høge temperaturar.

Temperaturar i Møre og Romsdal

SOMMARLEG: Dette er nokre av dei høgaste temperaturane målt torsdag 15. november i Møre og Romsdal. Rekdal leier med 18,1 grader.

– Det er veldig høge temperatuerer for å vere midt i november. I Møre og Romsdal spesielt, der er det eksepsjonelt mildt, seier statsmeteorolog Rafael Escobar Løvdahl.

Statsmeteorolog Rafael Escobar Løvdahl

– BLIR SNART NORMALT: Statsmeteorolog Rafael Escobar Løvdahl ser at lågare temperaturar er på veg til Noreg neste veke.

Foto: Eivind Molde / NRK

Men mildt er det også andre stader. Første halvdel av november har vore fleire grader varmare enn normalt over alt.

På Lillehammer har november-temperaturen til no vore nesten sju grader over normalen.

Her kan du sjå kor mange grader vi i år ligg over november-normalen:

Laster Twitter-innhold

Sol i vest - skyer i aust

Til helga kjem det inn eit høgtrykk som vil føra til finvêr over store delar av landet. Spesielt fint og varmt blir det på Vestlandet og opp mot Trondheimsfjorden.

– Vestlandet, Trøndelag og fjellet i Sør-Noreg ser ut til å få mest sol, fortel Escobar Løvdahl.

For dette høgtrykket betyr nemleg ikkje berre sol og fint vêr. Denne gongen åtvarar meteorologen mot tåkeskyer som vil leggje seg over Austlandet. Det er også meldt så lite vind at desse skyene kan bli liggjande irriterande lenge.

– Det er ikkje alltid at høgtrykk betyr sol og fint vêr. Men til fjells blir det fint. Det kan hende det er nok for Oslo-folk å ta turen til Tryvannshøgda for å få litt sol, forklarar meteorologen, som reknar med hovudstaden får rundt 10 grader på dagtid i helga.

Kraftig lågtrykk i nord

Sørlandet blir også tylla inn i eit skylag som sperrar for sola i helga. Men mildt blir det også der.

Det ser verre ut for vêrmeldingane for Nord-Noreg. Høgtrykket kjem dit også, men ikkje før utpå søndag.

– Alle kjem til å få kjenna på høgtrykket, men Nord-Noreg vil først få eit kraftig lågtrykk. Nordland kan venta seg kuling og regn fredag. Der lettar det først søndag då høgtrykket breier seg nordover, seier Rafael Escobar Løvdahl.

Her ser du korleis høgtrykket breier seg inn over Sør-Noreg fredag, før det bevegar seg roleg nordover:

Laster Twitter-innhold

– Kaldare neste veke

Dei unormalt høge temperaturane skal ikkje fortsetja ut i neste veke. Over helga søkk temperaturen kraftig. Då er det slutt på varmlufta frå Syd-Europa som nordmenn har varma seg på i fleire veker.

Meteorologen meiner temperaturen vil falle frå rundt 10 grader i Oslo til 5, og ha moglegheiter for nattefrost dersom himmelen er skyfri.

I Finnmark har det denne veka vore så mildt at graset har blitt grønt igjen, og begynt å spira. Vatn og elvar har halde seg uvanleg lenge utan å få is på seg.

LES MEIR: Går mot rekordvarm november i nord

– Over helga vil også Finnmark få meir normale november-temperaturar.