I år blir det store variasjonar i 8. mars-vêret kring om i Noreg. Det spriker frå solgløtt på Austlandet til storm i Nordland. Skal du gå i tog? Her finn du oversikt over tog-vêret i heile landet.
Oslo og Stavanger: Det beste tog-vêret
Det er sør- og austlendingane som no endeleg skal bli bønnhøyrde. For dei ser helgevêret lysare ut enn på lenge, og her treng ein ikkje dra på paraply i 8. mars – toget.
– Me får sjå sola att, og det er lenge sidan sist, seier Ingrid Berntsen ved Meteorologisk institutt i Oslo, glad for å endeleg få melde fint vêr til denne delen av landet.
Skal ein delta på 8. mars-aktivitetar i Oslo-området før klokka 12, er det stor sjanse for å møte sola. Men når toget frå Youngstorget går kl. 15, har nok sola stukke seg bort att.
– Då har det nok skya til, men ein slepp i alle fall å gå i regn. Det blir ingen nedbør på verken Austlandet eller Sørlandet på laurdag.
Sørlendingane får også opphaldsvêr i 8. mars – toget. Men dei som har mål om å få sjå sola må komme seg ut tidleg, for her skyar det til allereie på formiddagen.
(Artikkelen held fram under biletet)
STAVANGER: Feiring av Kvinnedagen, 8. mars i klart opphaldsvêr. Slik blir det i stor grad også i år.
Foto: Kirsti Wilhelmsen / NRKBergen: Ta med paraply for å vere sikker
Skal du gå i tog på Vestlandet, bør du vere førebudd på at det kan komme nedbør.
– Det ser ut til å bli opphaldsvêr når arrangementet i Bergen byrjar, kl. 15. Men det blir ein del vind, og det kjem nok nedbør i løpet av ettermiddagen, seier Arnstein Tjøstheim ved Vervarslinga på Vestlandet.
Han seier det truleg er opphaldsvêr når toget går klokka 16, men at det vil komme nedbør ganske raskt etter det.
Sjølv om vinden og byene på laurdag minskar utover dagen, vil det blåse opp i liten storm på Vestlandet utover laurdagen. Det vil også komme litt regn over heile Vestlandet utpå ettermiddag/kveld.
LES OGSÅ: Stor skredfare i helga
Trondheim: Fare for byer over toget
Skal du gå i tog i Midt-Noreg bør du vere førebudd på regnbyer.
– Det blir ikkje samanhengande nedbør, men det er fare for byer som kan bli til sludd, fortel meteorolog Arnstein Tjøstheim.
Rundt klokka 16–17 på ettermiddagen går det mot opphaldsvêr, men skal du til Torget kl. 13 og høyre på appellar bør du kle deg for å tole litt nedbør.
Temperaturane vil ligge på mellom 4–5 plussgrader, men kjem det nedbørsbyer kan desse søkke noko.
LES OGSÅ: Dette lågtrykket kan bli farleg
Tromsø: Surt og mykje vind
I Nord-Noreg må folk kle seg godt, for her blir det blautt og surt i gatene.
– Det blir forholdsvist surt i Tromsø. Folk som går i tog kan få kjenne på ein del kastevindar. Skal ein bere mykje banner kan dei trekke godt i vinden, og kjem dei verste vindkasta vil det rive godt, seier meteorolog Ola Mellem ved Vervarslinga for Nord-Noreg.
– Men tog i Tromsø-sentrum kan bli skjerma noko meir for vinden.
(Artikkelen held fram under biletet)
MYKJE VIND OG NEDBØR I NORD-NOREG: Kle deg godt om du vågar deg ut i tog i dag.
Foto: MAXPPP/PHOTOPQR/L'ALSACEI Nordland blir det sterkare vind som kjem opp i kortvarig, full og sterk storm. Utpå ettermiddagen vil vinden minke til vestleg sterk kuling.
– Det vil blåse ein del. Så det er ikkje akkurat det beste togvêret. I tillegg blir det også vått. Det vil komme nedbør heile dagen over heile Nord-Noreg, seier Mellem.
