Så varm vart hetebølgja i Middelhavet

Tidlegare denne veka var det varsla om hetebølgje i Spania, og somme andre område rundt Middelhavet. Ifølgje prognosane til Meteorologisk institutt ville indre delar av Sør-Spania bli aller verst råka, med temperaturar opp mot 43 grader onsdag og torsdag.

– Men kor heitt vart det eigentleg?

– Det vart litt varmare enn prognosane sa, seier vakthavande statsmeteorolog Mariann Foss.

46,9 grader på det meste

Tal frå Meteorologisk institutt viser at hetebølgja, som meldt, gjekk hardast utover indre delar av Sør-Spania.

Cordoba vart varmast, med målingar heilt opp i 46,9 grader torsdag ettermiddag. Dette er 10 grader meir enn normal makstemperatur i juli (36,8).

(Makstemperaturar er henta frå World Weather Information Service).

– Det er vanleg at innlandet i Spania får temperaturar opp mot 40 grader denne tida av året. Men temperaturar nær 47 grader er veldig mykje. Eg trur vi skal vere takksame for å sleppe dette, kommenterer statsmeteorolog Terje Alsvik Walløe.

• Madrid, som ligg endå lengre inn i landet, var også venta å bli treft av bølgja. Torsdag målte gradestokken 40,7 grader, noko som er 8,6 grader over normal makstemperatur i juli (32,1).
• I Sevilla var den varmaste temperaturen målt onsdag, med 43,6 grader. Normal makstemperatur her er 36,0.
• Granada målte 44,4 grader torsdag. Nær ti grader over normal makstemperatur på 34,8.

Kysten av Spania har ikkje opplevd same varmen. Barcelona hadde berre i underkant av 30 grader torsdag, Malaga 27,4 og i Alicante var det 32,5 grader.

– Eg vil tru nordmenn flest ferierer langs kysten denne årstida, og at dei varme storbyane i indre strøk heller vert besøkt som dagstur. Mange slepp nok derfor å oppleve denne sterke varmen. Det er veldig interessant å sjå at medan kysten har normale sommartemperaturar, er indre delar svært varme, reflekterer Walløe.

Ikkje berre Spania

Indre delar av Portugal var også venta å få smake på høge sommartemperaturar. Målaren bikka 40-talet fleire stadar.

• Beja i Portugal, 15 mil rett nord for Faro. Her viste gradestokken 42,6 grader torsdag ettermiddag. Ifølgje Yr sin statistikk er dette 10 grader over normal makstemperatur (32,7).
• Lisboa, som ligg ved kysten, målte i kontrast berre 34,7 grader på det meste. Her er normal makstemperatur 27,4.

I Hellas, Kroatia og Italia vil ikkje meteorolog Mariann Foss påstå temperaturen har vore mykje over normalen, men det har vore godt og varmt og over 30-talet. Men område i Tyrkia har målt over 40 grader.

– Ut ifrå det eg kan bedømme, er det generelle bildet at landa som ligg sør for 40 breiddegrader vart varmast, seier Mariann Foss.

Varmt nokre dagar til

– Varmen vil halde seg til over helga, men gradene vil kanskje minke med to grader for kvar dag etter fredag. Komande veke vert temperaturane i innlandet meir normale, opplyser meteorolog Mariann Foss.