Plasket ned på Hønefoss i natt

Natt til måndag kom det ein tredels månadsnedbør på Hønefoss i løpet av ein time.

Vann i veien i Oslo

VÅT MORGON: I rushtida måndagsmorgonen kunne ein godt merke mengdene vatn som kom på slutten av helga. Ingen andre stader regna det så mykje som i Oslo frå søndag morgon til måndag morgon.

Foto: Thomas Marthinsen / NRK

Etterlengta nedbør for svært mange.

Vêrstasjonen på Hønefoss tok imot 22,6 millimeter nedbør mellom kl. 04 og 05 natt til måndag.

Det er ein tredel av normal nedbørsmengd i byen i heile september.

Både gull, sølv og bronseplassen for mest nedbør på éin time, gjekk til målarar i Buskerud.

Laster Twitter-innhold

Oslo slo Bergen på 24 timar

I løpet av dei tolv timane mellom kl. 20 søndag kveld og kl. 08 måndag morgon var det Bergen som fekk mest regn i landet med 41,4 millimeter.

– Dette er ganske normalt for å vera i Bergen. Her har vi jo ein døgnrekord på 156,6 millimeter, fortel Lillian Kalve, klimavakt ved Meteorologisk institutt.

Laster Twitter-innhold

Men ser vi på siste døgnet, tidsrommet frå klokka 08 søndag morgon til same tid måndag, var det Oslo som fekk mest regn. Målaren på Bjørnholt registrerte 69,9 millimeter nedbør i løpet av dette døgnet. Mest i landet.

– Kontinuerlig regn i vest

Og meir regn er på veg. Heile denne veka står i nedbørens teikn på Vestlandet. Statsmeteorolog Magni Svanevik nyttar ordet kontinuerleg når ho skal beskriva kor mykje regn som er venta.

– Fram til og med fredag kan det kome 250 millimeter nedbør på Vestlandet. Og dette regnet kjem jamt heile tida, forklarar ho.

250 millimeter på seks døgn er ikkje i nærleiken av farleg. Det dobbelte ville bli vurdert som fare.

– Vestlandet toler ganske mykje nedbør, seier Svanevik.

Laster Twitter-innhold

Austlandet og austlege delar av Sørlandet vil få opphald og fint vêr frå onsdag. Trøndelag og Nordland vil også merka lågtrykksaktiviteten frå vest, men vil ifølge meteorologen ikkje få i nærleiken av dei 250 millimeterane med regn som kan kome ned over Vestlandet.