Ny haustferieveke: – Det ser ikkje så bra ut

– Det blir ein våt start på haustferien, seier Aslaug Skålevik Valved.

Fredag går haustferien mot slutten for dei fleste skulebarn på Aust- og Sørlandet. Då tek vestlandsfylka, Trøndelag og eit par fylke på Austlandet over feriemodusen (sjå faktaboks).

Allereie same kvelden friperioden startar skal regnet bøtte ned både i Vest- og Midt-Noreg. I Møre og Romsdal og Trøndelag bles det også opp til liten storm fredag kveld.

Og utsiktene? For meteorologen som skal gje haustferieklare nordmenn eit glimt inn i friveka er det ikkje så mykje anna enn vatn å sjå.

Til og med i Telemark og i Hedmark er det nedbør i vente. Sjølv om det ikkje er i same grad som Vestlandet og Trøndelag. Sjølvsagt.

Speilglatte vegar søndag

– Det blir ein forbigåande betring i vêret laurdag kveld. Det vil seie at det blir skyfritt og minusgrader natt til søndag, forklarar statsmeteorolog Aslaug Skålevik Valved.

Ho snakkar om dei fire Vestlandsfylka og Trøndelag. Søndag morgon kan det bli svært glatt på vegane mange stader der.

Heilt ned i låglandet i byane langs kysten.

Men dette fine vêret varer ikkje lenge. Allereie søndag kveld treffer ein ny front. Først Vestlandet, før den bevegar nordover til Trøndelag.

– Natt til måndag blir særdeles våt på Vestlandet. Då kan det komme svært mykje nedbør på kort tid, fortel Skålevik Valved.

Ein viss betring mot neste helg?

Utover i haustferieveka er prognosane usikre for Vestlandet og Trøndelag. Foreløpig er konklusjonen likevel:

– Det ser ikkje så bra ut. Det blir skya og vått i alle fall første delen av veka, fortel meteorologen.

Ho anar ein viss betring frå torsdag og inn mot neste helg. Men det er så langt fram at vêrmeldinga ikkje kan love noko.

Telemark kjem betre ut av haustferieveka. Men i helga er det venta nedbør også der. Heilt vest i fylket, vel å merke.

– Utover i veka blir det også så mildt at nedbøren kjem som regn høgt oppe i fjellet. Lenger austover i fylket blir det betre vêr, melder meteorologen.

Mildt blir det også i Hedmark, sjølv om det også her blir store forskjellar mellom lågland og høgfjell.

Også der kan ein få merke nokre dråpar frå himmelen i haustferien.

– I låglandet kan det bli så mykje som 10–12 grader. Og mot slutten av veka kan det komme noko spreidd nedbør, fortel meteorologen.