Eit høgtrykk er i ferd med å etablere seg over landet dei neste dagane.
– I første omgang betyr det strålande sommarvêr for store deler av Sør-Noreg. Temperaturane er venta å stige opp imot 25 til 30 grader onsdag, torsdag og fredag, seier statsmeteorolog Martin Granerød.
På Byrkjelo camping på Breim i Nordfjord er det full fart i den nydelege sommarvêret.
Bianca Fylkesnes kan fortelje at det aller beste er å kose seg og ha det kjekt når varmen står på.
– Men kva skal vi gjere om det blir for varmt då?
– Nei, då vi kan jo prøve å halde oss litt i skuggen, ete is og bade. Då tenker eg at vi klarer oss, er dei gode råda frå Bianca.
VARMT: Sjeldan syn i Noreg. Fredag blir det veldig varmt i Sør-Noreg, men varmen spreier seg nordover.
Foto: @meteorologene på TwitterSpreier seg nordover
Enkelte plassar vil temperaturen i Sør-Noreg kanskje bli enda litt høgare enn 30 pluss når fredagen kjem, men varmerekorden til Nesbyen på 35,6 grader står neppe for fall denne gongen.
– Dette høgtrykket bevegar seg sakte, men sikkert nordover. I løpet av dei neste dagane vil Midt-Noreg med Møre og Romsdal, Trøndelag og Helgeland få ganske bra vêr og temperaturen stig gradvis også der, slår Granerød fast.
Men nede på kontinentet ligg eit lågtrykk og lurer. Frå laurdag vil dette presse høgtrykket lenger nordover gjennom helga og i starten på neste veke.
– Då vil høgtrykket bli pressa nordover, slik at finvêret også brer seg utover Troms og Finnmark etter kvart, med temperaturar opp i 20 til 25 grader i indre strok.
MEIR IS: Arild Bjørkelo jobbar på Byrkjelo camping. Han er glad for at dei har fått påfyll med iskrem.
Foto: Oddgeir Sæle / NRK– Hugs solkrem
Men trass i meir ustabilt vêr i Sør-Noreg frå helga av, vil ikkje temperaturane synke tilsvarande. Det vil føre til auka luftfuktigheit, og ettermiddagsbyene kan bli kraftige.
– Det blir varmt, klamt og lummert, seier statsmeteorologen.
Som om ikkje det var nok, så er det også sendt ut gult farevarsel for skogbrann på Austlandet.
– Vi har sendt ut varsel på skogbrannfare på grunn av tørt vêr over lang tid, og dei byene vi har hatt har ikkje gitt nedbør over alt.
Ei lita oppmoding frå meteorologane er verd å ta med seg:
– Hugs å beskytte deg mot UV-strålane med både skugge, klede, solkrem og solbriller!
