No kjem sommarvêret – kan bli 20 grader fleire stader

Neste veke kjem sommarvêret til Sør-Noreg. Statsmeteorologen er «optimistisk» til 17. mai-vêret, men understrekar at det er langt fram.

Jenter badar ved den populære badeplassen Sponavikjo på Stord.

VARMT: På Vestlandet kan det bli opp til 20 grader fleire stader neste veke.

Foto: Eli Bjelland / NRK

– Det ser ut til å bli skikkeleg bra vær. Det vil bli relativt høge temperaturar som gjev sommarkjensle, seier statsmeteorolog Lars Andreas Selberg.

Eit lågtrykk frå Atlanteren tar med seg varme temperaturar som gjev opp til 20 grader fleire stadar i landet i neste veke.

Det kan kome litt nedbør nokre stadar i helga, men fortvil ikkje. Frå tysdag neste veke kjem sommarvêret.

– Det kan bli opp mot 20 grader fleire stader i Sør-Noreg, seier Selberg.

Spesielt Vestlandet kan vente seg ein skyfri himmel og problemfrie timar.

– Det er vanskeleg å utmerke ein vinnar, men foreløpig ser det ut som det er Vestlandet. Det ser bra ut i Sør-Noreg, seier statsmeteorologen.

Laster Twitter-innhold

Det er nok mange som har venta på å komme seg ut i hagen eller har sakna å ta på seg badeshortsen.

– Det er absolutt gode moglegheiter for å gjere ting i hagen og måle huset. Det kan vere periodar neste veke der vi kan få nedbør, men eg vel å vere optimistisk og at vi får skikkeleg godt vær og sommarkjensle, seier Selberg.

På festplassen i Bergen slapper folk av foran Lille-Lungeren, sol fra nesten skyfri himmel.

SOMMARVÊR: Det kan bli flotte dagar i store delar av Sør-Noreg neste veke.

Foto: Ann-Kristin Loodtz

Austlandet:

Frå helga kan eit lågtliggande skydekke vere med inn i neste veke, men temperaturen vil stige.

– På tysdag og onsdag kan ein få skikkelege sommardagar med temperaturar på 20 grader, seier Selberg.

Det er venta eit lågtrykk som kan gje litt nedbør inn mot neste helg.

Sørlandet:

Her kan ein vente seg ein dårleg start på veka med ein del nedbør i Agder. Men også her kan ein få gode temperaturar frå tysdag.

– Det kan kome litt meir regn inn mot neste helg slik som på Austlandet, seier statsmeteorologen.

Nord-Noreg:

No i helga kan ein vente seg snøbyer i Finnmark og Troms, men også her viser prognosane at temperaturen vil stige.

– Det ser ut til at luftmassen frå sør brer seg utover heile Noreg. I nord vil ein og få litt meir vårleg kjensle neste veke.

17. mai-været ser lovande ut

Fleire er nok spente på kva vær ein kan få på 17. mai. Tidlege prognosar gjev inntrykk om at det kan bli lite nedbør.

– Det er veldig langt fram i tid og på ingen måte sikkert, men månadsvarselet viser temperaturar over klimanormalen. Så det er moglegheiter for at det blir tørrare. Eg vil ikkje seie noko spesifikt, men eg er optimist og håper det blir tørt, varmt og fint, seier meteorologen.

– Ein må alltid hugse kvar ein bur og at det plutseleg kan snu igjen, understrekar han.

17. mai tog Hardanger

NASJONALDAGEN: Sjølv om det er ti dagar til nasjonaldagen ser dei tidlege prognosane bra ut for 17. mai. Her frå 17. mai-toget i Hardanger.

Foto: Øyvor Bakke / NRK