Vêret på Austlandet denne vinteren har skapt mykje frustrasjon. Grått vêr kan gje grå hår, men no er det ingen grunn til å fortvile lenger. Denne veka kjem faktisk vårsola.
– No får me nokre fine dagar i Sør–Noreg. Det blir mykje godt vêr til og med torsdag på Sørlandet og Austlandet, seier Ingrid Berntsen ved Meteorologisk institutt i Oslo.
Og det er på tide. Så grått har vêret vore, at når vårsola no kjem så gror det fram poetar. Rune Flækøy har sendt yr.no ein hyllest til sola.
Temperaturane blir også ganske bra i Sør–Noreg. Dei vil ligge på kring 10 plussgrader på dagtid, men det kan komme nattefrost.
Når det lir mot helg blir temperaturane noko lågare og det blir meir skya. Men fyrst kan ein verkeleg nyte dei fine dagane.
LES OGSÅ: Slik sjekkar du skiføret på nett
– Vårstemning på Vestlandet
MELDER VÅRVÊR: Vestlandet får mykje godt vêr denne veka, seier Martin Granerød ved Vervarslinga for Vestlandet.
Foto: NRKVestlendingane får også mykje bra vêr denne veka.
– Sør for Stad blir det ei bra veke. Det ligg eit høgtrykk over Sør–Norge som gjev noko som liknar på ein tidleg vår, seier Martin Granerød ved Vervarslinga for Vestlandet.
Det blir ein del sol i indre strøk. I ytre strøk blir det noko morgontåke, som gjerne ligg litt lenger enn ein ønsker. Temperaturen vil ligge på 7 – 9 plussgrader i låglandet, og det blir minusgrader på fjellet.
Nord for Stad og Møre og Romsdal får tysdag/onsdag sørvestleg vind opp mot liten kuling, og opp til sterk kuling i periodar.
– Her blir det ein halvskya vêrtype, men stort sett opphaldsvêr fram til torsdag, seier Granerød.
Torsdag kjem eit lågtrykk over heile Vestlandet som etter kvart gjev nedbør i låglandet og snø i fjellet.
– Forrykande regnvêr i Midt–Noreg
Vinteren i Midt–Noreg har vore svært tørr, noko som har gitt fleire skog- og lyngbrannar. Men no snur det verkeleg om.
Meteorologane har sendt ut eit fase A-varsel. Det vil seie at dei aukar overvakinga av vêrsituasjonen.
– Det blir nedbør heile veka, men onsdag blir det mest. Då kjem det store nedbørsmengder nord for Trondheimsfjorden, seier Granerød ved Vervarslinga på Vestlandet.
Temperaturen vil ligg på mellom 5–7 grader midt på dagen.
VARSLA PØSREGN PÅ ONSDAG: I Midt-Noreg har det vore tørt lenge, men no snur dette beint om.
Foto: prozaciswack/flickrStorm og nedbør i Nord–Noreg
I Nord–Noreg vil ikkje vinden bli så kraftig som i helga, men det vil framleis blåse godt.
– Det blir uroleg vêr denne veka. Stadig nye lågtrykk passerer oss, seier Tore Vassbø ved Vervarslinga for Nord–Noreg.
– Det kjem kraftig vind mellom sørvest og nordvest, og me får periodar med storm. I periodar kjem det også ein god del nedbør.
Temperaturane i Troms og Finnmark vil veksle mellom pluss og minusgrader, og mot helga vil det jamt over bli kaldare i nord.
SEND TIL YR.NO: Ferske bilete av vêret der du er
